Read Maasai Bible – Biblia Sinyati Olkerempe le Nkai 45 Bible Online

Olkerempe le Nkai 45 - Maasai Bible – Biblia Sinyati bible

Olkerempe le Nkai 45

¹Enetii olautaroni le ranyare anaa ntapuka naaji lili: Osinkolio le nkiteng'ena loo Layiok le Kora, osinkolio le nyorrata. Eiputa aadooyo to ltau lai ilomon supati; naliki nanu olaiguanani irorei lo sinkolio lai; eikununo olng'ejep lai anaa enkalamu o lasirani arriyia.

²Ira iyie sidai too nkera e tung'ani; etubukokoki empiris enkutuk ino; ore te nkaraki ina, kitamayiana Enkai ntarasi.

³Teena olalem lino te mpolos ino, iyie ele magilani, tiatua enkitoo ino o enkishiaa!

⁴Ore te nkishiaa ino shomo isula te nkaraki esipata nimitu ilo asipani; nchoo enkaina ino e tatene mikinteng'ena nkiaasin naaitureisho!

⁵Kepi mbaa inono, netii atua iltauja loo lmang'ati lo laiguanani, nebatata iloreren ti abori iyie.

⁶Ore ilo orika lino le nkitoo, Enkai, nebikoo ntarasi o ntarasi. Ore ina ng'udi ino e nkitoria naa eng'udi oo sipat;

⁷inyor iyie esupatisho nimba enkarruoisho. Metaa ore Enkai, ina Ai ino kitubukoko eilata aput teina ilata e ng'ida nikintulusoo too lchoreta linono.

⁸Ore ilkilani linono neitorropili te nkorropil o too sonkoyoni o erropili o sinantei ore tiatua nena ajijik e nkitoo oo lala loo lkanchaoni, netii nkinantani oo usin nikintishipieki iyie.

⁹Ore ntoyie oo laiguanak netii te nebo nena kituaak inono naayanyiti; ore te nkaina ino e tatene neitashe enkaiguanani eishopito saabu naing'uaa Ofir.

¹⁰Toning'o, iyie natito, tadamu, nirrugu enkiok ino; nchoo kirikino olorere linyi o enkaji e papaai lino,

¹¹pee etum olaiguanani atishipakinoyu enkishiaa ino. Ore amu olkitok lino ninye, irrugokinoyu ninye;

¹²ore iltung'ana le nkop e Tiro neyau nkishoorot, lelo karsisi aalang iltung'ana pooki,

¹³eeta enkarsisisho oo mpukunot pooki. Eikodoki entito o laiguanani to lgilata lenye te nkaji e nkitoo, too ilkilani lenyena ooripuno too usin e saabu.

¹⁴Ore etukuse too lkilani loo muain kumok, nerikokini olaiguanani, te nebo nena selenken naairukurukore ninye.

¹⁵Nerikuni ninche te nchipai o te ng'ida, ina kata ejing atua ina aji e nkitoo o laiguanani.

¹⁶Ore te rishata oo loo papaai linyi naa keaku ilayiok linono; naa ilo iyie aitaa ninche kituaak te nkop pooki.

¹⁷Kaisho nanu enkarna ino metoning'oyu too ishoritin pooki, metaa eikisis iyie iloreren ntarasi o ntarasi.