Read Maasai Bible – Biblia Sinyati Olkerempe le Nkai 46 Bible Online

Olkerempe le Nkai 46 - Maasai Bible – Biblia Sinyati bible

Olkerempe le Nkai 46

¹Enetii olautaroni le ranyare: Osinkolio loo Layiok le Kora. Anaa oltoilo le Alamot. Enkai osempewuet lang naa engolon ang, eretoto nataana ninye te nkata e nyamali.

²Ore te nkaraki ina mikiureisho hoo duoo ninye tenaa keibelekenya enkop, hoo duoo ninye tenaa keikirikira ildoinyo te mpolos e naiposha;

³hoo tenaa keikurrukur inkariak e naiposha neitayu labur, hoo tenaa keikirikira ildoinyo te nkaraki olarrabal.

⁴Etii olkeju oitiship nchorroi enyena enkanasa o Laitoriani, ina manyisho sinyati e ilo Otii Shumata Aisul.

⁵Etii Enkai atua ina anasa, nemeigusugusieki ninye; keretu Enkai ninye tadekenya.

⁶Etagorote iloshon, neikirikirate nkitoriat; neiro ninye to ltoilo lenye, neshola enkop.

⁷Etii Olaitoriani loo lororani te nebo iyiook; Enkai e Yakobo ninye esarunoto ang.

⁸Wootu eng'ura isiaaitin o laitoriani, eneikuna ninye pee eitomijoon enkop.

⁹Ninye oishie ilarrabali o metabaiki ineeiting'ie enkop; ninye ogil enkawuo nedot empere, nepejoo ngarrin oo mbartan te nkima!

¹⁰“Ntirring'ayu, niyiolou nchere nanu Enkai. Kara nanu kitok tiatua iloshon, aaitaaki nanu kitok te nkop!”

¹¹Etii Olaitoriani loo lororani te nebo iyiook; Enkai e Yakobo ninye esarunoto ang.