Read Maasai Bible – Biblia Sinyati Olkerempe le Nkai 49 Bible Online

Olkerempe le Nkai 49 - Maasai Bible – Biblia Sinyati bible

Olkerempe le Nkai 49

¹Enetii olautaroni le ranyare: Osinkolio loo Layiok le Kora. Entoning ena lo oreren! Enchoru nkiyiaa, intae pooki oomanya enkop,

²o liabori o le shumata, olkarsis o laisinani te nebo!

³Keiro enkutuk ai ine ng'eno nagut; ore nkibirribirrat o ltau lai naa keaku eyiolounoto.

⁴Kairrugoki nanu enkiok ai endung'et e rashe; nawalu nanu oloyiote lai te oshoto o lwulul.

⁵Kainyoo nanu pee aureisho te nkata e nyamali, te naaman nanu entorroni oo laisilisilok laainei,

⁶lelo tung'ana ooisilig karsisisho enye, neitokoos te nkaraki enkumoi oo masaa enye?

⁷Kesipa meetae oltung'ani okordu kewan, anaa oloisho Enkai enkinyiang'a e nkishui enye,

⁸amu ore enkordunoto e nkishui o ltung'ani naa kegol, nemeidimi aekata aainyiang'u,

⁹pee etum oltung'ani ataa keishu ntarasi, nemejing ae kata Engumoto.

¹⁰Ee, kedol ninye nchere, ekeye sii ninye ilo ng'en, ore ilo modai o lkiminchali naa keidaaya te nebo neing'ueiki ina arsisisho enye ilkulikae.

¹¹Nkuraren enye ninche nkang'itie enye ntarasi, ninche imanyishoritin enye tiatua iishoritin pooki, hoo neipot ninche nkuapi aajo nkunenye.

¹²Mebikoo oltung'ani te nkitoo enye, keikununo ninye anaa eng'ues naidaaya.

¹³Ena enkoitoi e lelo oomoda, enkiting'oto e lelo ooshipakino erubata enye.

¹⁴Etiu ninche anaa ntare naayae enemeneng'a, neaku keeya olchekut lenye; neitoriori ninche aadoiki Engumoto, ore esidano e nkitobirunoto enye neidaaya aish; neaku enemeneng'a enkang enye.

¹⁵Kake kekordu Enkai enkishui ai aitung'uaa engolon e Nemeneng'a, amu kaang'amu ninye nanu.

¹⁶Mirut iyie te neaku oltung'ani karsis aashu te neponari enkitoo e nkaji enye,

¹⁷amu te neye ninye nemenap toki, melo enkitoo enye asujaa ninye.

¹⁸Ore hoo neikenaa kewan ajo keshipa eton eishu, anaa hoo netum oltung'ani enkisisa te neitaas kewan esidai,

¹⁹keyooki ake alo enetii ilporori loo loo menye, lelo lemeigil ai kata aadol ewang'an.

²⁰Mebikoo oltung'ani tiatua enkitoo enye, etiu ninye anaa eng'ues naidaaya.