Read Maasai Bible – Biblia Sinyati Olkerempe le Nkai 5 Bible Online

Olkerempe le Nkai 5 - Maasai Bible – Biblia Sinyati bible

Olkerempe le Nkai 5

¹Enetii olaut aroni le ranyare: too ndulen. Osinkolio le Daudi. Toning'o irorei laainei, iyie Olaitoriani; toduaa ndamunot aainei o ltau.

²Toning'o oltoilo le nkishirata ai, Olaiguanani lai naa Enkai ai, amu iyie aomon nanu.

³Iyie Olaitoriani, ining iyie oltoilo lai tadekenya; ore tadekenya naaitobiraki nanu iyie olasar, naton aanyisho.

⁴Amu mira iyie Enkai nashipakino entorroni; nemeton entorroni te nebo iyie.

⁵Meidim ilo oitokoos aitasho te dukuya inkonyek inono; imba iyie ilaasak loo ntorrok pooki.

⁶Indaikie iyie lelo ooiro elejare; neitame Olaitoriani lelo oata enkure o sarge o laimonkok.

⁷Kake ore nanu te nkaraki ina nyorrata ino sapuk nauno, naa kajing atua enkaji ino; kaseremisho nanu aipirare ina aji ino sinyati te uriata ino.

⁸Torikoyioki nanu Olaitoriani te supatisho ino, te nkaraki ilmang'ati laainei; ntorioi enkoitoi ino te dukuya nanu.

⁹Amu metii esipata nkutukie enye; ore iltauja lenye naa enkidaata, ore inaajo naa monko naapuo enkidaata, neikordodisho too lng'ejepa lenye.

¹⁰Nchoo ninche enap enkitarruorroto enye, iyie Enkai; nchoo ninche ebatata too nkiguanat enye maate; ore te nkaraki nkitarruorot enye kumok taarai ninche mpang'ie, amu kitogolong'akita ninche iyie.

¹¹Kake nchoo lelo pooki likisaru iyie meting'idata, nchoo ninche metaranyisho anaake te ng'ida; naa tomitu iyie ninche, paa ore lelo pooki oonyor enkarna ino niking'idakino iyie.

¹²Amu imayian iyie ilo asipani, iyie Olaitoriani; nintushur iyie ninye te nyorrata ino anaa elong'o.