Read Maasai Bible – Biblia Sinyati Olkerempe le Nkai 56 Bible Online

Olkerempe le Nkai 56 - Maasai Bible – Biblia Sinyati bible

Olkerempe le Nkai 56

¹Enetii olautaroni le ranyare. Anaa oltoilo le nturkuluo, Osinkolio le nkarriyiano le Daudi pee eibung Ilfilisti te Gat. Ing'urrieki nanu, iyie Enkai, amu aaitunyokito iltung'ana enkop; ore endama pooki naaisilisil nanu iltung'ana.

²Aaitunyokito ilmang'ati laainei enkop endama pooki, amu ilkumok laarare nanu te nkitokoos.

³Te naureishoyu nanu napik osiligi lai atua iyie.

⁴Atua ina Ai naisisita nanu ororei lenye, Enkai naisiligita metii enkuretisho. Kaa nanu aaidim tung'ani aitaasa?

⁵Ore endama pooki neing'oru ninche pee eibelekeny irorei laainei; ore ndamunot enye pooki naa nanu egilunore te ntorroni.

⁶Neiturrurro ninche te nebo, neisudori, neing'or iroruat aainei. Ejo pee aar matua

⁷ntalaa ninche te nkaraki enkarruoisho enye; ore te ngoro ino, iyie Enkai, tusulaki ninche enkop!

⁸Nkena iyie enkirrang'irrang ai; tipika iyie ilkiyio laainei oltulet lino! Aimetii ninche atua embuku ino?

⁹Naa kerrinyi ilmang'ati laainei siadi teina kata naaishiraki nanu iyie. Kayiolo nanu ena, nchere ketii Enkai enchoto ai.

¹⁰Ore te nkidimata e Nkai naa kaisis nanu ororei lenye, Ore te nkidimata o Laitoriani naa kaisis nanu ororei lenye.

¹¹Enkai aisilig nanu, maata enkuretisho. Kaa nanu aaidim tung'ani aitaasa?

¹²Ore lelo muma laainei te iyie naa kaitabaya, kaishoru nanu olasar le nashe te iyie.

¹³Amu itokordua iyie enkishui ai te keeya, ee, nintajeu inkejek aainei te mbatatata, pee atum nanu ashomo te dukuya Enkai tiatua ewang'an e nkishui ai.