Read Maasai Bible – Biblia Sinyati Olkerempe le Nkai 59 Bible Online

Olkerempe le Nkai 59 - Maasai Bible – Biblia Sinyati bible

Olkerempe le Nkai 59

¹Enetii olautaroni le ranyare: Osinkolio le nkarriyiano le Daudi pee eirriwaa Saulo iltung'ana metorripo enkaji e Daudi pee etumoki atasesekuan ninye. Tokorduaki nanu too lmang'ati laainei, iyie Enkai, Tomituoki nanu te lelo laadumakino aagilunore,

²tokorduaki nanu te lelo ooitobir entorroni, nikintajeu nanu too ltung'ana ooata enkure o sarge.

³Amu keirrag ninche pee aarresh nanu aar matua, neiturrurro lelo pushunot te nebo pee aar nanu. Neme te nkaraki enkitarruorroto ai anaa eng'oki ai, Olaitoriani,

⁴ore ninye maata enataasa, nekuet ninche aapuo aanapa. Tudumunye, wou taretoki nanu, ning'orisho!

⁵Iyie Olaitoriani, Enkai oo lororani, iyie Enkai e Israel. Tudumunye ntamio iloshon pooki; mileku ninye obo le lelo ooipiru entorroni.

⁶Ore too nteipan nerrinyunye ninche, nebuak anaa ildiein neman enkanasa.

⁷Ng'ura ninche, eimujumuj inkutukie enye, netiu inkutukie enye anaa lalema - nejo ninche, “Kaing'ae oning iyiook?”

⁸Kake ore iyie, Olaitoriani, ikueniyie ninche; ninkoroj iyie iloreren pooki.

⁹Na golon ai, kaaranyaki nanu isinkolioitin le nkisisa; amu ore, iyie Enkai, iyie osempewuet lai.

¹⁰Ore Enkai teina nyorrata enye nauno naa kelotu enatii; kaaisho nanu Enkai ai matoduaa enkishuroto too lmang'ati laainei.

¹¹Miar ninche metuata, merikino ake iltung'ana laainei. Ndapasha ninche te ngolon ino, nintadou ninche, Olaitoriani, iyie elong'o ang!

¹²Ore te nkaraki eng'oki oo nkutukie enye, lelo rorei lenye, nchoo ninche metijing'a orreshet lo lwuasa lenye. Te nkaraki ildeketa o elejare naitayu ninche,

¹³tumuta ninche te ngoro ino, tumuta ninche o metaba anaa neishunye, pee etum iltung'ana aatayioloito nchere Enkai naitoreisho tiatua Yakobo o metabaiki ineeiting'ie enkop.

¹⁴Ore too nteipan nerrinyunye ninche, nebuak anaa ildiein neman enkanasa.

¹⁵Nemanimanaa ninche aaing'oru endaa, neing'unyung'uny enkewarie pooki te neitu eraposho.

¹⁶Kake karanyaki nanu emagilanisho ino karany nanu abuaku isinkolioitin le nyorrata ino tadekenya. Amu itaa iyie osempewuet te nanu, itaa esarunoto ai te nkolong o sina lai.

¹⁷Na golon ai, kaaranyaki nanu iyie isinkolioitin le nkisisa, amu iyie, iyie Enkai, osempewuet lai, iyie Enkai naaitodol nanu enyorrata nauno.