Read Maasai Bible – Biblia Sinyati Olkerempe le Nkai 60 Bible Online

Olkerempe le Nkai 60 - Maasai Bible – Biblia Sinyati bible

Olkerempe le Nkai 60

¹Enetii olautaroni le ranyare: Anaa oltoilo le “Nkaitubului osotua.” Osinkolio le nkarriyiano le Daudi eiteng'enisho, pee earare Aram Naaraim o Aram-Soba o pee eeshukunye Yoab nesesekuan inkalifuni tomon o are oo le Edom te Nong'oto e Munyan. Iyie Enkai, inturrayie iyie iyiook, nitigila iltimito; itagore iyie, tokordu siaake iyiook.

²Iyie oikirikirie enkop, iyie oiperra abol; tarama ine netabee, amu keikirikira.

³Itipika iyie iltungana linono, osina kitok inchoo iyie iyiook enaisho oo sabibu naitemerisho.

⁴Ituuno iyie enanka te nkaraki lelo likiure, pee etumi aaitoduaai te nkaraki esipata.

⁵Pee etumi aatokordu ilo lino linyor, nchooo iyiook enkisulata te nkaina ino e tatene, niwaliki iyiook!

⁶Eiroro Enkai tiatua enkaji enye sinyati: “Naa kaor nanu Shekem te ng'ida kitok, narishu ierat le Sukot.

⁷Enaai Gilead; enaai Manase; ore Efraim naa enkopiyia ai o larrabal; ore Yuda naa eng'udi ai e nkitoo.

⁸Ore Moab naa embakuli ai naitukuore; shumata Edom nanu aiteleiki ina amuke ai; naa te shumata Filistia nanu abuaku te nkisulata.”

⁹Kaing'ae laayau nanu atua ina anasa nasheta? Kaing'ae laarik nanu Edom?

¹⁰Keitu iyie inturraa iyiook, iyie Enkai? Miloito iyie, iyie Enkai, tenebo njoreitin ang.

¹¹Nchoo iyiook engolon te nkaraki ilmang'ati lang, amu pesho eretoto e tung'ani!

¹²Ore te retoto e Nkai nikiaas iyiook mbaa sapuki, amu ninye olo aitunyoo ilmang'ati lang.