Read Maasai Bible – Biblia Sinyati Olkerempe le Nkai 63 Bible Online

Olkerempe le Nkai 63 - Maasai Bible – Biblia Sinyati bible

Olkerempe le Nkai 63

¹Osinkolio le Daudi enapa kata etii olpurkel le Yuda. Na Ai, ira iyie Enkai iyie nanu aing'oru, iyie eetayie oltau lai enkure; kaiterre nanu te yieunoto ino, atiu anaa oltung'ani otii enkop natoyio nemetii enkare.

²Neaku, aaing'orua nanu iyie tiatua ine wueji ino sinyati, naing'or engolon ino o enkitoo ino.

³Amu ore ina nyorrata ino nauno, naa eisidai alang enkishui, kaaisis nanu iyie te nkutuk ai.

⁴Naa kaaisis nanu iyie anaa naishu; kailepie nanu inkaik aainei naipot enkarna ino.

⁵Etaraposhe oltau lai te mpiron o te ilata, nikisis enkutuk ai te ng'ida,

⁶te naadamu nanu iyie te ndapash ai, naibirribir mbaa inono airragita kewarie;

⁷amu itaa apa iyie eretoto ai, naa tiabori oloip loo naipuko inono nanu aranyisho te ng'ida.

⁸Iyie eigarakino oltau lai, enkaina ino e tatene naairishu nanu.

⁹Kake ore lelo ooing'oru pee eidaikie enkishui ai, naa kedoyio aapuo olodo le nkop;

¹⁰keishoori ninche aapik engolon o lalem, keaku ninche endaa oo mbariak.

¹¹Kake keng'idakino olaiguanani Enkai; ore lelo oonya olmumai te ninye neaku kituaak; amu ore nkutukie e lelo alejak naa keitigiri.