Read Maasai Bible – Biblia Sinyati Olkerempe le Nkai 64 Bible Online

Olkerempe le Nkai 64 - Maasai Bible – Biblia Sinyati bible

Olkerempe le Nkai 64

¹Enetii olautaroni le ranyare: Osinkolio le Daudi. Toning'o oltoilo lai, le nkilepilep ai, iyie Enkai, tagolie enkishui ai te mbatisho e ilo mang'atinta,

²isudoyioki nanu ntung'uayioki ilnukat le ilo torrono, ntung'uayioki mpuot oo laasak loo ntorrok,

³lelo ooitotiu ilng'ejepa lenye anaa lalema, lelo ooing'oru irorei oopi anaa mbaa,

⁴neng'or etii atua ilnukat ilo asipani, neng'or ninye aaluam metii enkuretisho.

⁵Neibung ninche aakurraki nena kitobirat enye torrok, neimaki ninche pee eirragie irresheta loo nkisudorot, edamu aajo, “Aing'ae oidim atoduaa iyiook?

⁶Kaing'ae oidim aing'oru nkitarruorot ang? Kitadamutua iyiook nikintobir olnukata te ng'eno.” Amu ore endamunoto e atua oltau le tung'ani naa kegut!

⁷Kake keng'or Enkai ninche te mbae enye, nepiki ninche ilbaa nabo kata.

⁸Ore te nkaraki nkirorot enye, kelo ninye aidaikie ninche; ore pooki oodol ninche neipirripir ilukuny enye.

⁹Netum taa iltung'ana pooki aatureita; nelimu ninche ina nataasa Enkai, nedamu ina nataasa ninye.

¹⁰Nchoo ilo asipani eng'ida tiatua Olaitoriani, nisaru ninye! Nchoo lelo pooki sidain iltauja menoto enchipai sapuk.