Read Maasai Bible – Biblia Sinyati Olkerempe le Nkai 68 Bible Online

Olkerempe le Nkai 68 - Maasai Bible – Biblia Sinyati bible

Olkerempe le Nkai 68

¹Enetii olautaroni le ranyare: Osinkolio le Daudi. Nchoo Enkai metudumunye, nchoo meidapashata ilmang'ati lenyena; nchoo lelo ooiba ninye meisika te dukuya ninye.

²Ore anaa enakutari empuruo tukutai ninche, nkuna neijia; anaa enashola enkapoi te nkima nchoo ilarruok meidaai te dukuya Enkai.

³Kake nchoo lelo supati meting'idata; nchoo ninche meting'idata te dukuya Enkai; nchoo ninche metishipata oleng!

⁴Entaranyaki Olaitoriani, entarany enkisisa e nkarna enye; elepie osinkolio entaranyaki ninye, ilo olo te shumata nkatampo; ore enkarna enye naa Olaitoriani, enting'idata te dukuya ninye!

⁵Menye le lelo okishin, naa olamitunoni loo nkolia, Enkai teine wueji enye sinyati.

⁶Enkai naisho ilo lemeeta ang ewueji nemany, nerikoo lelo ooena metudupoto; kake ore lelo maisero netoni te nkop natoyio.

⁷Iyie Enkai, ore apa pee ilo arikoo iltung'ana linono, ore apa pee ilo iyie aim olpurkel,

⁸neikirikira enkop, neshau shumata enkare, teine netii Enkai; eikirikire oldoinyo le Sinai te dukuya Enkai, ina Ai e Israel.

⁹Irriwua iyie enchan kitok, Enkai, nintagol enjung'ore ino enaurate;

¹⁰netum inkerra inono emanyisho tiatua ninye; te supatisho ino, na Ai, intoti iyie ilaisinak.

¹¹Eishorua Olaitoriani enkitanapata; eikitok olorora le lelo oonap ilomon supati:

¹²“Ore ilaiguanak loo njorin, neilanyisho aaisik!” Ore nkituaak naaing'uari ti ang neor nena yarunot

¹³ore hoo neirrag ninche tiatua imuatat, eikununo inaipuko enye anaa ine nturkuluo naamura te nkosholai, ore nkopir enye neiyia anaa saabu nanyori.

¹⁴Ore te neidapash olmagilani lelo aiguanak, nedoiki empaso Salmon.

¹⁵Lo doinyo le Nkai, lo doinyo le Bashan; lo doinyo loo mowuarak kumok, lo doinyo le Bashan!

¹⁶Kainyoo iyie pee ing'or to lom, lo doinyo loo rruka kumok, ilo doinyo oyieu Enkai neitaa emanyisho enye, ee, ine nelo Olaitoriani abikie ntarasi?

¹⁷Too ngarrin oo mbartan magil, nkalifuni tomon katitin are, nkalifuni o nkalifuni, apa eeunye Olaitoriani eing'uaa Sinai, nelotu atua ine wueji sinyati.

¹⁸Ilepa iyie alo shumata oleng, nirik lelo yarunot araya, ning'amaa nkishoorot too ltung'ana, ning'amaa sii ine lelo torrok, pee etum Olaitoriani Enkai atobiko teine.

¹⁹Meisisi Olaitoriani, laa ninye onap iyiook anaake; Enkai ninye enjeunoto ang.

²⁰Enkai ang ninye Enkai e njeunoto; naa eno Laitoriani, Enkai, enkordunoto te keeya.

²¹Kepurd Enkai ilukuny oo lmang'ati lenyena, o enkopiyia naju e nkitoo e ilo olo too nkoitoi enyena torrok.

²²Etejo Olaitoriani, “Karrinyu nanu ninche aitung'uaa Bashan, Karrinyu nanu ninche aitung'uaa ineegut e naiposha,

²³pee itum iyie aitukuo nkejek inono to sarge, ore ilng'ejepa loo ldiein linono netum erubata enye te lelo mang'ati.”

²⁴Kelioo ilotot inono, iyie Enkai, nena gilakinot e Nkai ai, Olaiguanani lai, elo atua ewueji sinyati -

²⁵etii ilaranyak dukuya, netii ilaoshok loo ntampurini siadi, ore erishata enye netii ntoyie naakut ndulen:

²⁶“Meisisi Olaitoriani tiatua eumata kitok, ee, iyie, Olaitoriani, amu iyie entalipa e Israel!”

²⁷Etii Benchamen, ilo oti te ninye, dukuya, netii lelo kituaak le Yuda iwuejitin enye, o lelo kituaak le Sebulon o lelo le Naftali.

²⁸Iyie Enkai, mpotu enkidimata ino; ntodolu engolon ino, iyie Enkai, amu iyie apa oitaasa iyiook ene nking'asia.

²⁹Te nkaraki enkaji e Nkai te Yerusalem, teine kiyaki iyie ilaiguanak nkishoorot.

³⁰Tabuaaki iyie nena ng'uesi naatii atua enarau, o ina luaata oo loing'ok natii te nebo ilasho le tung'ana. Nkirikirie tiabori nkejek inono lelo oong'uar kodi; ndapasha lelo oreren ooshipakino olarrabal.

³¹Nchoo meyauni osuyai te Misiri; nchoo Etiopia metasioki aitorioki Enkai nkaik enyena.

³²Entaranyaki Enkai na kitoriat pooki e nkop; entaranyaki Olaitoriani enkisisa,

³³ninye ilo okedito nkatampo te keper, ina keper e apa moitie; ng'ura, neirriu ninye oltoilo lenye, ilo toilo lenye magilani.

³⁴Embalunye engolon e Nkai, ilo otii enkidimata enye shumata Israel, netii engolon enye atua nkatampo.

³⁵Keitureisho Enkai tiatua ine wueji enye sinyati, ina Ai e Israel, neisho ninye engolon o enkidimata iltung'ana lenyena.