Read Maasai Bible – Biblia Sinyati Olkerempe le Nkai 69 Bible Online

Olkerempe le Nkai 69 - Maasai Bible – Biblia Sinyati bible

Olkerempe le Nkai 69

¹Enetii olautaroni le ranyare anaa oltoilo loo ntapuka. Osinkolio le Daudi. Ntajewuoki nanu, iyie Enkai! Amu aatabaikitia nkariak emurt.

²Aimiso nanu tiatua esarng'ab teine nemetii ewueji napik enkeju; atijing'a nanu nkariak naagut, naaya nanu oloirrag le nkare.

³Anaure nanu te nkishirata ai; aatirridate ilgoso. Neiliilaitie inkonyek aainei, aanyita Enkai ai.

⁴Eikumok aalang ilpapit le ndukuya ai lelo laaiba nanu pesho metii emporeet; eimagil lelo laaidim nanu aaidaikie, lelo laarasaki nanu te lejare. Amaa, ina neitu nanu apurroo, kaaitalaki nanu matorrinyo taata?

⁵Iyie Enkai, iyiolo iyie emodai ai; ore ntorrok nataasa, meisudoro te iyie.

⁶Mincho lelo likisilig iyie meitukurruni te nkaraki nanu, Olaitoriani, Enkai oo lororani; mincho lelo liking'oru iyie etum enkurruna te nkaraki nanu, iyie Enkai e Israel.

⁷Amu te nkaraki iyie pee anoto esulare, neiputa enkurruna enkomom ai.

⁸Atotiwuo nanu anaa oltung'ani omoni too lalashera laainei, naaku ole boo too nkera e yieyio.

⁹Amu aainosa nanu olom te nkaraki enkaji ino, ore nena sukenyat e lelo likisukeny iyie, naatadoikitio nanu.

¹⁰Te naitobor nanu oltau lai te mpukoroto, neaku ina enkurruna.

¹¹Te naitaa nanu ilkuniyiani nkilani aainei, naaku nanu entoki naimakini te ninche.

¹²Etaa nanu ederrie lelo ootoni te kishomi, netaa nanu eokore ilamerak.

¹³Kake ore nanu, naa iyie airriwaki enkomono ai, Olaitoriani. Ore te nkata nang'amaroyu, iyie Enkai, tang'amayioki nanu teina nyorrata ino nauno.

¹⁴Teina retoto ino naisiligunoyu tokorduaki nanu maimis tiatua esarng'ab; nchooki nanu manoto enkordunoto too lmang'ati laainei, o too nkariak naagut.

¹⁵Mikincho nanu maawa oloirrag le nkare, anaa aaijoo nanu ina guton, anaa aagamaa engumoto.

¹⁶Tawalikiaki nanu, Olaitoriani, amu ore ina nyorrata ino nauno naa eisidai; ore te risioroto o lng'ur lino, mbelekenyunye enatii nanu.

¹⁷Misudoo enkomom ino to sinka lino; amu atii nanu atua osina, tasioki tawalikiaki nanu.

¹⁸Tataanikiaki nanu, tokorduaki nanu, talakuaki nanu, te nkaraki ilmang'ati laainei!

¹⁹Iyiolo iyie esulare ai, o esulare ai o enkurruna ai; iyiolo iyie ilmang'ati laainei pooki.

²⁰Etigila imorot oltau lai, neaku atapalari nanu, naing'oru olaaing'urrie, kake metii obo; naing'oru olaaitagol oshoke, kake eito nanu atum obo.

²¹Aaishoo ninche esayiet aaitaa endaa, ore aata enkure naaisho ninche siki.

²²Nchoo emisa enye te dukuya ninche metaa orreshet; nchoo lelo siruai lenye loo lasarri metaa entoki narruesh ninche.

²³Nchoo meitamodoki nkonyek enye pee medolisho; neikirikira mpolosi enye anaake.

²⁴Tubukoki engoro ino shumata ninche, nincho ina goro ino nayupuyup metumurutu ninche.

²⁵Metomijoono enkang enye, metaa metumi aekata olojing ilng'oborri lenye.

²⁶Amu keisilisil ninche ilo litoosho, o ilo litipika iyie olbae, neponiki ninche ninye emion oleng.

²⁷Toponiki ninche nkitamiot te shumata nkitamiot; metaa metum aekata ninche elaaroto te iyie.

²⁸Nchoo metujuti nkarn enye aaiwuang'ie tiatua embuku oo looishu; nchoo metaa meigeri ninche te nebo lelo supati.

²⁹Kake aata nanu osina naata emion; nchoo enjeunoto ino, iyie Enkai maatudumu nanu ailepunye!

³⁰Kaisis nanu enkarna e Nkai to sinkolio; narrep nanu ninye te nkishooroto e nashe.

³¹Keitiship ena Olaitoriani alang olkiteng anaa oloing'oni loo mowuarak neeta loisotok.

³²Nchoo ilo oitorogonyaki metoduaa ena neng'idayu, ore intae lelo ooing'oru Enkai, enchoo epiu iltauja linyi.

³³Amu kening Olaitoriani ilo oata enyamali nemerikino lelo lenyena ooena.

³⁴Nchoo shumata o enkop meisisa ninye, o enaiposha o pooki toki naatii atua.

³⁵Amu keitajeu Enkai Sion, neigil ashetu nkanas e Yuda; nepuo isinkan lenyena aamany ine, neya ine;

³⁶ore nena kera oo sinkan lenyena naa kejung ine, ore lelo oonyor enkarna enye nepuo aamany ine.