Read Maasai Bible – Biblia Sinyati Olkerempe le Nkai 7 Bible Online

Olkerempe le Nkai 7 - Maasai Bible – Biblia Sinyati bible

Olkerempe le Nkai 7

¹Osinkolio le nkishirata le Daudi otaranyaka Olaitoriani eimaki Kush ilo Benjamini. Iyie Olaitoriani Enkai ai, iyie nanu asaru; ntajewuoki nanu te lelo mang'ati pooki laasujita, nikikordu nanu,

²maaibung ake anaa olng'atuny, naaing'irtitoo aanya, metii hoo obo laamitu.

³Iyie Olaitoriani Enkai ai, te nataasa nanu ena, te netii entorroni nkaik aainei,

⁴tenaa katalaaka nanu olchore lai te ntorroni, tenaa kaitajewuo nanu ilo mang'atinta lai pesho,

⁵nchoo ninye ilo mang'tinta lai aasuj naainepu nanu, naa nchoo ninye eitunyoki enkishui ai enkop, neipurrupur oltau lai.

⁶Tudumunye Olaitoriani te ngoro ino, ntaisheikinore tigilunore ina pushuna oo lmang'ati laainei; inyo na Ai ai; amu itudung'o iyie enkiguana.

⁷Nchoo eumata oo ltung'ana kinturrurrokino iyie, aaman; ore te shumata tipika olorika lino.

⁸Olaitoriani oiguanare loreren; nguanareki nanu iyie Olaitoriani, te risioroto oo sipat aainei, o te risioroto e ina biotisho e supatisho ai.

⁹Nchoo eiting entorroni e lelo torrok, kake ntubulai ilo supat, iyie ilo otem ndamunot o ltauja, iyie Enkai oo sipat.

¹⁰Enkai ninye elong'o ai, ninye oitajeu ilo supat to ltau.

¹¹Enkai olaiguanani loo sipat, naa Enkai naata engoro nkolong'i pooki.

¹²Te nemeirridu oltung'ani, neii Enkai olalem lenye, eteyietuo ninye enkawuo enye;

¹³neitobira ninye nena masaa enyena o larrabal torrok, nepik mbaa enyena esayiet napi.

¹⁴Ore ilo tung'ani torrono nedamu entorroni, nenuta ninye too ntabo, neiu elejare.

¹⁵Neitobiru ninye engumoto aturu, nedoiki atua ina gumoto.

¹⁶Ore ina taboi enye nerrinyokino enkorrok enye makewan, naa endukuya enye makewan edoiki entaboi enye.

¹⁷Kaisho nanu Olaitoriani enashe nairirikino esupatisho enye, naranyaki nanu te nkisisa enkarna o Laitoriani, Ilo otii shumata Aisul.