Read Maasai Bible – Biblia Sinyati Olkerempe le Nkai 73 Bible Online

Olkerempe le Nkai 73 - Maasai Bible – Biblia Sinyati bible

Olkerempe le Nkai 73

¹Osinkolio le Asaf. Kesipa aisupat Enkai te ilo oitoriori nkoitoi enyena, te lelo sidain iltauja.

²Kake ore tialo nanu eyieu errorro nkejek aainei, eyieu eideketari nkejek aainei.

³Amu kaata nanu olom te lelo ooitokoos, ina kata pee adol nanu dupoto e lelo arruok.

⁴Amu meeta ninche emion, negol naa sidain iseseni lenye.

⁵Meeta ninche enyamali anaa enaata iltung'ana, nemeitamei ninche anaa ilkulikae tung'ana.

⁶Ore te nkaraki ina, olwuasa ninye osaei lenye le murt, olarrabal oimulumul ninche anaa olkila.

⁷Kebuku iltauja lenye intorrok, netulusoitie mbaa enye aalang iltauja lenye.

⁸Neikordodisho ninche, neiro mbaa torrok; ore te nkitokoos neiro mbaa naaitorogonyie ilkulikae.

⁹Nebol ninche nkutukie enye aaing'orie shumata, neidapashaki ilng'ejepa lenye enkop.

¹⁰Ore te nkaraki ina neibelekenya iltung'ana aaisis ninche; nemetumie ninche entioto.

¹¹Nejo ninche, “Kaji eiko Enkai te neyiolou? Keeta eng'eno Ilo otii Shumata Aisul?”

¹²Ng'ura ajo iltung'ana torrok kulo; neisikarra ninche anaake, neponari ninche te karsisisho.

¹³Pesho ake nanu aitisinya oltau lai, naituku inkaik aainei te sinyatisho.

¹⁴Amu ore endama pooki naatooshoki nanu, naaitamei nkakeny pooki.

¹⁵Naa te najo nanu, “Kalimu kuna,” anaata maaku asipani te ishoi oo nkera aainei.

¹⁶Naa te nadamu nanu ajo ayiolou kuna, naa enyamali te nanu.

¹⁷Ore ake pee alo atua ewueji sinyati e Nkai, namusu taa enkiting'oto enye.

¹⁸Esipa itipika iyie ninche iwuejitin neeideket; nchoo iyie ninche metabatatata aaidaaya.

¹⁹Kaji eikunakaki ninche enkidaaroto nabo kata, eishieki ninche tukul te nkiputukuny.

²⁰Etiu ninche anaa enkidetidet te neinyototo oltung'ani, te nidumunye iyie, Olaitoriani, niwuang'ie ina golon enye.

²¹Te netum oltau lai emion, te neitagori oltau lai,

²²naa kamoda apa nanu mayiolo toki, natiu apa nanu anaa eng'ues tialo iyie.

²³Ore ake eyia natii nanu te nebo iyie; kimbung'a iyie enkaina ai e tatene.

²⁴Iyie likitorikoyie nanu te nkiguana ino, ore te siadi niking'amaa nanu te nkitoo ino.

²⁵Kaing'ae nanu aata te keper leme iyie? Nemetii ai toki natii oriong enkop nang'uar nanu naadutie.

²⁶Keidim inkiri o sesen lai o ltau lai aaishunye, kake Enkai engolon o ltau lai naa erubata ai ntarasi.

²⁷Ore lelo likilamita iyie naa keidaaya; inting'ie iyie lelo arruok tialo iyie.

²⁸Kake ore nanu eisidai te nataaniki Enkai; aitaa nanu Olaitoriani Enkai esarunoto ai, pee atum atolimu isiaaitin inono pooki.