Read Maasai Bible – Biblia Sinyati Olkerempe le Nkai 79 Bible Online

Olkerempe le Nkai 79 - Maasai Bible – Biblia Sinyati bible

Olkerempe le Nkai 79

¹Osinkolio le Asaf. Na Ai, eetuo lelo limikiyiolo aajing atua enjung'ore ino; etipika ninche olminong atua enkaji ino sinyati; eitaa ninche Yerusalem olmuaate.

²Eishoo ninche mpopoki oo seseni loo sinkan linono, ilmotonyi lo loing'ang'e meitaa endaa, ore lelo sinyat linono nenya ing'uesi e nkop nkiri oo seseni lenye.

³Eibukoitie isargeta lenye anaa enkare te manaroto pooki e Yerusalem, nemeetae hoo obo onukaa ninche.

⁴Kitaa iyiook entoki nailapi te lelo le latia ang, nesukenyi neikuyukuyaki lelo oomanita iyiook.

⁵Ke nkata nabaa Olaitoriani? Igoro iyie ntarasi? Keyupuyup ina goro o lom lino anaa enkima?

⁶Tubukoki engoro ino lelo oshon limikiyiolo iyie, o shumata nena kitoriat nemeipot enkarna ino!

⁷Amu eidaikie ninche Yakobo, neitomijoon emanyisho enye.

⁸Midamu te iyiook entorroni oo loo papa; nchoo olng'ur lino metasieku anang'are iyiook, amu eitadouoki iyiook oleng.

⁹Taretu iyiook, Na Ai e njeunoto ang, te nkaraki enkitoo e nkarna ino; tokordu iyiook, nipalaki iyiook ing'ok ang, te nkaraki enkarna ino!

¹⁰Kainyoo pee ejo iloshon, “Koree Enkai enye?” Nchoo ina lap, apa enkibukoroto o sarge loo sinkan linono metayiolouni too loshon pooki te dukuya nkonyek ang!

¹¹Nchoo ilo kiyioi le lelo ooena meeu dukuya iyie; ore te risioroto e ngolon ino kitok tagolie lelo ootudung'okoki keeya!

¹²Ntalaa katitin naapishana lelo le latia ang too lgooitie lenye nena kilapat apa nikilapa ninche iyie, Olaitoriani!

¹³Ore taa iyiook iltung'ana linono, ina luaata e nkirrita ino, nikincho iyie enashe ntarasi; ore ebaiki iishoritin o ishoritin, nikilimu enkisisa ino.