Read Maasai Bible – Biblia Sinyati Olkerempe le Nkai 80 Bible Online

Olkerempe le Nkai 80 - Maasai Bible – Biblia Sinyati bible

Olkerempe le Nkai 80

¹Enetii olautaroni le ranyare anaa oltoilo loo ntapuka. Shakenisho e Asaf. Osinkolio. Nchoru enkiok Lo Airritani le Israel, iyie ilo orikoo Yosef anaa eluaata oo ntare! Iyie ilo otii olorika le nkitoo te nchumata oo lkerubi,

²nintawang'isho te dukuya Efraim o Benchamen o Manase. Tuputu enkidimata ino, nilotu aitajeu iyiook!

³Torrinyu iyiook, Na Ai; nchoo enkomom ino ewang'u, pee etumi aaitajeu iyiook!

⁴Olaitoriani Enkai oo lororani, ke nkata nabaa iyie igorokino enkomono oo ltung'ana linono?

⁵Nintotio iyie ninche te mukate oo lkiyio, nincho ninche metooko ilkiyio te nkumoi.

⁶Nintaa iyiook ilmang'ati too le latia ang; ore ilmang'ati lang nekueni maate.

⁷Torrinyu iyiook, Na Ai oo lororani; nchoo enkomom ino metawang'a, pee etumi aaitajeu iyiook!

⁸Iyie oyaua isabibu aitung'uaa enkop e Misiri; iyie otaarayie iloshon niun ilo sabibu.

⁹Iyie oitukut enkop te nkaraki ninye; neibung ntona naapuo atua enkop neiput enkop.

¹⁰Neitoip oloip lenye ildoinyo, neitoip ilng'osil lenyena iltarakua sapuki;

¹¹nereu ilng'osil lenyena aitabaiki enaiposha, neitabaiki ntona enyena olkeju.

¹²Kainyoo naa iyie pee itigila enkikarrata enye, neaku ore pooki oogiroo aaim enkoitoi, neng'osilu ilng'anayio lenyena?

¹³Neinyala ilbitiro le ntim ninye, ore nena pooki naapuo ti ong'ata nenya ninye.

¹⁴Nyaaki mbelekenyunye, Na Ai oo lororani! Ing'ura kop itii shumata, nidol, tishilai ele sabibu,

¹⁵ilo shani lituuno iyie te nkaina ino e tatene.

¹⁶Etapejoitie ninche ninye te nkurma, netudung'o ninche aauroo; meidaai ninche te nkisikong'ata e nkomom ino!

¹⁷Kake nchoo enkaina ino elotu shumata ilo le nkaina ino e tatene, ina kerai e tung'ani nintagolo iyie te nkaraki kewan ino!

¹⁸Nemikiingil ae kata iyiook aaibelekenya aaing'uaa iyie; nchoo iyiook enkishui, pee kitum aaipoto enkarna ino!

¹⁹Torrinyu iyiook Olaitoriani Enkai oo lororani! Nchoo enkomom ino metawang'a, pee etumi aaitajeu iyiook!