Read Maasai Bible – Biblia Sinyati Olkerempe le Nkai 83 Bible Online

Olkerempe le Nkai 83 - Maasai Bible – Biblia Sinyati bible

Olkerempe le Nkai 83

¹Osinkolio. Olkerempe le Asaf. Na Ai ai, mintoki iyie agira; migira nemintirring'a, Iyie Enkai!

²Amu ng'ura ajo ebuakita ilmang'ati linono; neilepie ilukuny lelo likimba iyie.

³Neitobir nkitobirat torrok too ltung'ana linono, neiguanakino te nebo pee ear lelo litomituo iyie.

⁴Nejo ninche, “Wootu, matujutu ninche aaishie anaa olosho, nchoo enkarna e Israel eaku meigili aekata aadamu!”

⁵Ee, neiguanakino ninche to ltau obo; neitobir ninche olning'o pee kitum aataarare iyie -

⁶o lelo ng'oborri le Edom o le Ishmael, o le Moab o le Hagari,

⁷o Gebal o Amon o Amaleki, o Filistia te nebo lelo oomanya Tiro;

⁸eibung'are sii Asiria ninche; ninche engolon oo nkera e Lutu.

⁹Intaasa ninche enapa nintaasa Midian, o Sisera o Yabin to lkeju le Kishon,

¹⁰lelo apa ooidakieki te Endor, lelo otaa nkik te nkop.

¹¹Intotiwuo lelo kituaak lenye anaa Orebu o Seebu, nintotiu ilkituaak lenye pooki anaa Seba o Salmuna,

¹²lelo apa ootejo, “Mawaita ena kop e Nkai aaitaa enaang.”

¹³Na Ai ai, ntaa ninche enterit, nchoo etiu anaa suut naakutaa osiwuo.

¹⁴Ore anaa enaaibung enkima entim, o anaa enalo olng'ejep le nkima enchumata o ldoinyo,

¹⁵neijia nkuna, tusujai ninche to lkutati lino, nturia ninche to lemua lino!

¹⁶Mputa nkomomi enye enkurruna, pee etum ninche aaing'oru enkarna ino, iyie Olaitoriani.

¹⁷Nchoo ninche meitukurruni, neidang ntarasi; nchoo ninche meidaai te sulare.

¹⁸Nchoo ninche metayiolo nchere iyie ake openy eji enkarna Olaitoriani, iyie Otii Shumata Aisul te nkop pooki.