Read Maasai Bible – Biblia Sinyati Olkerempe le Nkai 90 Bible Online

Olkerempe le Nkai 90 - Maasai Bible – Biblia Sinyati bible

Olkerempe le Nkai 90

¹Enkomono e Musa, oltung'ani le Nkai. Olaitoriani, iyie emanyisho ang, tiatua iishoritin pooki.

²Ore apa eton eitu eitobiruni ildoinyo, aashu enkop pooki, ebaiki ntarasi o ntarasi, iyie Enkai.

³Irrinyoki iyie tung'ani meshomo enterit, nijo, “Entorrinyoto, nakera e tung'ana

⁴Amu ore ilarin enkalifu nabo too nkonyek inono netiu anaa ng'ole te nelusoo, aashu anaa erripore e nkewarie.

⁵Ioroo iyie iltung'ana aiwuang'ie; netiu ninche anaa enkidetidet, netiu anaa nkujit naaipilipil tadekenya;

⁶ore tadekenya neitapuku neipilipil, ore teipa nemuguta netoyu.

⁷Amu eidaikie iyiook engoro ino; ore te nkaraki engoro ino nikiruto iyiook.

⁸Itipika iyie nkitarruorot ang dukuya iyie, ore nena ng'ok ang naaisudoro netii dukuya nkonyek inono.

⁹Amu etulusoitie nkolong'i ang pooki tiabori engoro ino, naa keiting ilarin lang anaa enkiyang'ata.

¹⁰Ore ilarin te nkishui ang naa ntomoni naapishana, naa ntomoni isiet te nikigol; ore too lelo arin naa enkisiaayiare ake o sina; nalusoo aasiooyo, nikipuo sii iyiook aish.

¹¹Aing'ae oiguanare engolon e ngoro ino, o empushuna ino te risioroto e uriata ino?

¹²Nteng'ena naa iyiook enkikenata oo nkolong'i ang, pee kitum aanoto oltau le ng'eno nagut.

¹³Torrinyunye, Olaitoriani, O anu kenya? Ing'urrie isinkan linono!

¹⁴Ntaraposho iyiook anaake tadekenya teina nyorrata ino nauno, pee kitum aating'idata nikishipa too nkolong'i ang pooki.

¹⁵Nting'ida iyiook too nkolong'i kumok naaba anaa ininosie iyiook osina, too larin ooba anaa ilikitodolie entorroni.

¹⁶Nchoo meibalunyeki esiaai ino too sinkan linono, neibalunyeki ina golon ino kitok too nkera enye.

¹⁷Nchoo esupatisho o Laitoriani Enkai ang elotu shumata iyiook, nintagol iyie esiaai oo nkaik ang te shumata iyiook, ee, ntagolo iyie esiaai oo nkaik ang.”