Read Maasai Bible – Biblia Sinyati Olkerempe le Nkai 91 Bible Online

Olkerempe le Nkai 91 - Maasai Bible – Biblia Sinyati bible

Olkerempe le Nkai 91

¹Ore ilo obik to lng'obor le ilo otii Shumata aisul; ilo obik tiatua oloip lo lmagilani,

²kelo ajoki Olaitoriani, “Esarunoto ai naa osempewuet lai; Enkai ai naa ninye aisilig.”

³Amu eikikordu ninye iyie aitayu te ilo rreshet lo larreshoni, o too lmeita torrok.

⁴Eikimulumul ninye too naipuko enyena, ore ti abori inaipuko enyena nitum esarunoto; ore esupatisho enye naa elong'o o emitunoto.

⁵Mitum iyie enkuretisho kewarie, nimikitum embae nang'oruni dama,

⁶anaa olmeitai olo tiatua enaimin, anaa te nkidaata namutisho te ndama.

⁷Keidim aatabatata iltung'ana enkalifu nabo te mbata ino, nebatata nkalifuni tomon te nkalo ino e tatene, kake mikinyikaki iyie.

⁸Ing'or ake too nkonyek inono, nidol elaakinoto oo larruok.

⁹Ore te nkaraki nintaa Olaitoriani esarunoto ino, nintaa Ilo Otii Shumata Aisul emanyisho ino,

¹⁰meetae entorroni nalotu enitii, meetae olmeitai onyikaki olng'obor lino.

¹¹Amu keisho ninye olmalaika lenye mikitagolie iyie, nikirrip too nkoitoi inono pooki.

¹²Nikinap ninche too nkaik enye, pee minkob ake osoit te nkeju ino.

¹³Ilo iyie aroro olng'atuny o enturbubua, intuny iyie olng'atuny o lasurai too nkejek inono.

¹⁴Ejo Olaitoriani, “Ore te nkaraki naatonyorra ninye nanu, kakordu nanu ninye; kamitu nanu ninye, te nkaraki nayiolo ninye enkarna ai.

¹⁵Te naaipot ninye nanu nawaliki nanu ninye; kaaku nanu te nebo ninye te nkata e nyamali, kamitu nanu ninye nayanyitu ninye.

¹⁶Naitaraposh ninye te nkishui naado, naitodol ninye enjeunoto ai.”