Read Maasai Bible – Biblia Sinyati Olkerempe le Nkai 94 Bible Online

Olkerempe le Nkai 94 - Maasai Bible – Biblia Sinyati bible

Olkerempe le Nkai 94

¹Olaitoriani, ira iyie Enkai e lap, Iyie Enkai e lap, tawang'a!

²Tudumunye, lo adung'oni le nkiguana le nkop, nchoo lelo oowuasa inaairirikino ninche!

³Iyie Olaitoriani, o anu kenya errup ate kulo torrok, o anu kenya eisulie kulo torrok.

⁴Neruku ninche irorei lenye le pesho, neitokoos ninche te ntorroni pooki.

⁵Nerratany ninche iltungana linono, Olaitoriani, neisilisil enjung'ore ino.

⁶Near ninche metua enkoliai o ilo tung'ani omoni, nesesekuan ilo okishi.

⁷Nejo ninche, “Medol Olaitoriani; memusu Enkai e Yakobo.”

⁸Tayiolo, ele omoda aisul! Lo moda, kanu kenya ing'enunu?

⁹Amaa, ilo oitobira enkiok, ae mening'isho ninye? Amaa, ilo oitobira enkong'u, ae medolisho ninye?

¹⁰Amaa ilo oitame iloshon, ae meitameisho ninye? Amaa ilo oiteng'en iltung'ana te ng'eno ijo pasa aimeeta eng'eno nagut?

¹¹Keyiolo Olaitoriani ndamunot oo ltung'ana nchere enkijape ake.

¹²Kemayiana ilo tung'ani lintame iyie, Olaitoriani, ilo linteng'en iyie too nkitanapat inono

¹³pee incho ninye enkiyeng'iyeng'ata te nkata e nyamali, o metaba anaa neturokini ilo torrono engumoto.

¹⁴Amu meituraa Olaitoriani iltung'ana lenyena; meing'uaa ninye enjung'ore enye;

¹⁵amu kelotu esipata enetii lelo supati, ore lelo pooki sidain iltauja, nesuj.

¹⁶Kalo odumunye te nkaraki nanu agilunore ilo torrono? Kalo oitashe te rishata ai agilunore ilaasak loo ntorrok?

¹⁷Te neme Olaitoriani otaa eretoto ai, anaata etobiko enkishui ai te nkop e ngira.

¹⁸Te nadamisho nanu, “Neideketari enkeju ai,” enyorrata ino nauno, Olaitoriani, ninye naaibung'ita.

¹⁹Ore te nkumoi oo ndamunot aainei, naa enkitagoloto ino naaitagol oshoke.

²⁰Keidim ilarikok arruok aaibung'ata o iyie, lelo ooitobiru ntabo te nkoitoi oo nkitanapat?

²¹Keiturrurro ninche te nebo aagilunore ilo supat, nedung'oki ilo asipani enkiguana e keeya.

²²Kake etaa Olaitoriani osempewuet lai, etaa Enkai ai endapidapoi e sarunoto ai.

²³Kerrinyoki ninye ninche ntorrok enye, nejut ninche aiwuang'ie te nkaraki enkarruoisho enye; kejutoo Olaitoriani Enkai ang ninche aiwuang'ie.