Read Maasai Bible – Biblia Sinyati Ndung'eta e Rashe 1 Bible Online

Ndung'eta e Rashe 1 - Maasai Bible – Biblia Sinyati bible

Ndung'eta e Rashe 1

¹Indung'eta e rashe kuna e Solomon, olayioni le Daudi, olaiguanani le Israel.

²Etisiraki kuna dung'eta e rashe pee etum iltung'ana aatayiolo eng'eno o enkiteng'enare, nening'u irorei oogut le ng'eno,

³neng'amu enkiteng'enare te ng'eno naretisho, neng'amu esipata o enkiguana nasipa o emborron

⁴pee etumi aishoo eng'eno sidai olmodai netum ilbarnot eng'eno nayiolounye eneikunari te nkishon.

⁵Ore sii ninye oltung'ani ng'en nening neponaa eyiolounoto, ore oltung'ani oata ening'unoto, netum anoto enkarriyiano sapuk

⁶pee itum atoning'u endung'et e rashe o enkipirta enye o lelo rorei loo lang'eni o loyietiaa lenye.

⁷Ore euriata o Laitoriani naa ninye enkiterunoto e ng'eno, keany ilmoda eng'eno o utarot.

⁸Toning'o enkerai ai enkikoo e papaai lino, nimiany enkiteng'enare e yieyioo lino;

⁹amu keaku nena utarot enkishili te ndukuya ino, neaku olpisiai te murt ino.

¹⁰Enkerai ai, tinikilejaa ake ilaasak loo ng'ok, minyorraa mikitelejari.

¹¹Naa tinikijoki ninche, “Wou tenebo iyiook mairraga aanyu osarge likimbukoo. Matarresh kisudori aaluam ilo lemeeta entioto;

¹²anaa enemeneng'a matoijoi ninche eishu, nelulung'a, anaa lelo oopuo aadoiki engumoto;

¹³aikitum imasaa pooki e tipat, nikimput inkajijik ang intokitin nikitaarutua;

¹⁴tipika sii iyie erubata ino atua iyiook neaku olbene obo kiata.”

¹⁵Enkerai ai, miim ina oitoi tenebo ninche, mboo enkeju ino pee meim inkoitoi enye;

¹⁶amu kekuetiki inkejek enye aas intorrok, nesiooyo aaibukoo osarge.

¹⁷Te mpesho isalaash orreshet, edolita imotonyi,

¹⁸Kake ore lelo tung'ana keirrag aanyisho naa osarge lenye erreshoo, enkishui enye ninye erreshoo.

¹⁹Neijia etiu inkoitoi e lelo pooki ootum dupoto te nkikonya; keitayu enkishui aaitung'uaa iloopeny.

²⁰Keishir eng'eno abuaku te nkoitoi dapash e nkanasa, neitayu oltoilo lenye too wuejitin neemirishoreki.

²¹Ore te nchumata oo sunta eishira abuaku; neiro too nchomito enkanasa ejo:

²²“Ke rishata nabaa, intae iloo moda inyorraa aaku ilmoda? Ke rishata nabaa enyor iloo lderrat torrok aaimaki ilderrat torrok. Neiba ilmoda eng'eno?

²³Embung'a intae enking'odiata ai o eutaroto; eng'ura, kabukoki intae iutarot oo ndamunot aainei naa kaitayiolo intae irorei laainei.

²⁴Amu aipotishe nianyianya kining'ining'i, aitorioyie enkaina ai nemetii hoo obo otishilayie,

²⁵neitu ishilaa enkikoo ai pooki, neitu ishilaa enking'odia ai o utarot aainei pooki.

²⁶Ekaakueniyie sii nanu intae te nkata e ngolikinoto inyi, naa kasurdaany intae te neosh intae olkirutoto,

²⁷te neosh intae olkirutoto anaa olkutati, nelotu engolikinoto inyi anaa osiwuo torrono te nelotu osina o emion shumata intae.

²⁸Neaku kaapuonu ninche aaipot nanu, nemawaliki nanu ninche; naa kaaing'oru ninche nanu oleng nemaatum nanu.

²⁹Amu keiba ninche eng'eno, neitu egelu euriata o Laitoriani.

³⁰Meyieu enkikoo ai hoo nabo, netemenaitie enkisikong'ata o eutaroto ai pooki.

³¹Metaa kenya ninche ilng'anayio le nkoitoi enye, neitarruoo inkoitoi enye maate.

³²Amu etaara engogong'i enye ilmoda metuata, ore enkiyagata oo lmoda neidaikie ninche;

³³kake ore ilo laaning nanu naa kebik eserian, naa keyeng'iyeng'a eton, meeta enkuretisho e ntorroni.”