Read Maasai Bible – Biblia Sinyati Ndung'eta e Rashe 19 Bible Online

Ndung'eta e Rashe 19 - Maasai Bible – Biblia Sinyati bible

Ndung'eta e Rashe 19

¹Enaikash oltung'ani aisinani olo too sipat enyena alang ilo oitadiak too nkirorot enyena naa olmodai sii.

²Meishaakino oltung'ani te nemeeta eng'eno, naa ore ilo oitasiooyo nkejek enyena, nepong enkoitoi enye.

³Ore te nerikoki emodai oltung'ani enkoitoi enkidaaroto, negorokino oltau lenye Olaitoriani.

⁴Keyau enkarsisisho ilchoreta kumok ng'ejuko, kake ore oltung'ani aisinani nepuo aaing'uaa ilchoreta lenyena.

⁵Ore olchakeni lemesipa nemelo eitu eitamei, naa ore ilo oiro elejare nemeilanyisho aisik.

⁶Eing'oru ilkumok omom o ltung'ani aminin, ore pooki tung'ani naa olchore le ilo tung'ani oishooyo inkishoorot.

⁷Ore ilalashera pooki lo laisinani naa keibayu ninye, kebaa pasa elakuani nepuo ilchoreta lenyena aalam ninye! Kesuj ninye ninche too rorei, nemetum ninye ninche.

⁸Ore ilo oata eng'eno nagut naa kenyor kewan; ore ilo oiteng'el ening'unoto naa kebul.

⁹Ore olchakeni lemesipa nemelo eitu eitamei, ore ilo oiro inelejare naa keimin.

¹⁰Meishaakino olmodai teneton tiatua olkar, naa neijia sii etiu orrindik meitore ilaiguanak.

¹¹Ore endamunoto sidai nemeitasieku engoro o ltung'ani, naa enkisisa te ninye te neitunyoo entorroni.

¹²Ore engoro napi o laiguanani netiu anaa enkikurrukur o lng'atuny, kake ore omom enye netiu anaa enkoileelio natii inkujit.

¹³Ore olayioni omoda naa enkidaaroto te menye, ore enkitok enchankar netiu anaa enkirujuruj e nchan.

¹⁴Ore enkaji o enkarsisisho naa enjung'o naing'uaa iloo papa, kake ore enkitok ng'en naa Olaitoriani eing'uaa.

¹⁵Keyaki enchalan oltung'ani injo naairoishi, ore oltung'ani oshal naa ketum esumash.

¹⁶Ore ilo oibung inkitanapat nerrip enkishui enye; ore ilo omenaa ororei naa keye.

¹⁷Ore ilo oitanana oshoke too laisinak naa Olaitoriani eisilenoko, naa kelaaki olaitoriani ninye enkias enye.

¹⁸Intamio tuutai enkerai ino eton eetae osiligi; mincho oltau lino ejing errorroto enye.

¹⁹Ore oltung'ani le ngoro napi naa kelak enkitamioto enye; amu tinilaku ninye taata, naa iyiooki ake aigil alaku.

²⁰Toning'u enkikoo ning'amaa enkiteng'enare, pee itum anoto eng'eno too nkolong'i naapuonu.

²¹Etii nkitobirat kumok endukuya o ltung'ani, kake ina nayieu Olaitoriani ninye ake naitashe aaku.

²²Ore entoki nayieuni to ltung'ani naa enkanyit, naa olaisinani oikash alang olalejani.

²³Ore euriata o Laitoriani naa aikirikoki enkishui; naa ore ilo oata neyeng'iyeng'a etaraposhe, melotu entorroni enetii ninye.

²⁴Ore oltashalai, nenukaa enkaina enye tiatua embakuli nati endaa, nemeitoki hoo ninye ayau apik enkutuk enye.

²⁵Toosho ilo asurdaanyani, ore ilo modai neyiolou ine ng'eno; intodua elde oata ening'unoto, naa ketum eng'eno.

²⁶Ore ilo oarare menye, nearaa ng'otonye tiang, naa olayioni oyau esulare neyau sii enkurruna.

²⁷Ore tiniminining'u nkiteng'enat aainei enkerai ai, nipong'ori alo apaash irorei le ng'eno.

²⁸Ore olchakeni lemeeta tipat te likae nekueniyie enkiguana nasipa, ore enkutuk oltorrono naa keijoo intorrok.

²⁹Eidipaki endung'okinoto e nkiguana te lelo oosukeny isipat o oshot too nkoriong'i oo lmoda.