Read Maasai Bible – Biblia Sinyati Ndung'eta e Rashe 25 Bible Online

Ndung'eta e Rashe 25 - Maasai Bible – Biblia Sinyati bible

Ndung'eta e Rashe 25

¹Ore sii kuna naa indung'eta e rashe e Solomon naatisira iltung'ana le Hesekia olaiguanani le Yuda.

²Enkitoo enkisisa te Nkai te neisudoo ninye imbaa, kake enkitoo too laiguanak, te nejurru imbaa aaibalie.

³Ore anaa eneba elakuani e keper o eneba enguton e nkop neijia etiu indamunot oo laiguanak mejurrunoyu.

⁴Tooju[9] endoron ti oriong e nkosholai, netum olkunoni entoki naitainyie entoki sidai.

⁵Iwuang'ie lelo torrok te dukuya olaiguanani naa keitasheyieki olorika lenye le nkitoo te sipata.

⁶Mipik kewan dukuya ine netii olaiguanani aashu doi intashe teine wueji olkitok.

⁷Enaikash tinikijokini, “wou ilepu ene” alang tinikintadoyiori te netii olaiguanani.

⁸Ore ina natoduaa inkonyek inono, misioki aisosion ayau atua enkiguana; anaa kaa ias te siadi; tinikilo ole latia ino aitukurru?

⁹Iimaki olomoni liyieu te nebo olelatia makewan, nimilo aboloo imbaa naaisudoro e likae.

¹⁰Meyau ake ilo oning enkurruna shumata iyie, nitum enkurruna nemeeta enkiting'oto.

¹¹Ore ororei otolimuoki aaitobiru netiu anaa olng'anayioi le saabu oikodokino enkosholai.

¹²Ore anaa enatiu olgisoi le saabu aashu emasaai e saabu, neijia etiu ilo ng'en oisikong enkiok naning'isho.

¹³Ore olkilikuai oisiligayu, neitagol ilo oirriwaa ninye, etiu anaa enkare nairobi, te nkirouaj enkata e nkikesare.

¹⁴Ore anaa enatiu inkatampo o lkutati lemeeta enchan, neijia etiu ilo owuasare enkishooroto nemeyieu neishooyo.

¹⁵Te ng'iriata eidimi aailejileja olaiguanani le nkop, naa ore olng'ejep omelok naa kegil oloito.

¹⁶Tinitum enaisho oo lotorok inosa ake enikiririkino iyie, amu indim ainosa esapuk nintoki alopu.

¹⁷Mimoku enkaji o lelatia ino, pee miyek ake, nikiyiooki aibayu.

¹⁸Ore ilo oishakenu embae nemesipa te nkaraki ole latia enye, netiu anaa orinka lo larrabal aashu olalem, aashu embae napi.

¹⁹Ore enkisiligata oltung'ani lemeisiligayu te nkata enyamali, netiu anaa olalae oigusugus aashu enkeju tarush.

²⁰Ore ilo oranyaki osinkolio oltau oata osina, netiu anaa oltung'ani ooru kewan enkila te nkolong nairobi; netiu sii anaa tinipik enaisho naisuisho ewueji netii olbae.

²¹Teneeta olmang'atinta lino esumash, inchoo ninye endaa nanya, naa te neeta enkure, inchoo ninye enkare naok.

²²Amu inteleikia ninye inkuk naaishu enchumata endukuya enye, naa aikilaaki iyie Olaitoriani.

²³Ore olkutati oing'uaa moikuape naa keyau enchan; ore olng'ejep okurrisho neyau engoro.

²⁴Enaikash tinimany olpijata le nchumata enkaji, alang tiniboitare te nkaji enkitok naata enchankar.

²⁵Ore anaa enatiu enkare nairobi to ltau oata enkure, neijia etiu ilomon supati ooing'uaa enkop nalakua.

²⁶Ore anaa enatiu enchorro natii esarng'ab, aashu enkong'u enkare naing'ola, neijia etiu oltung'ani supat oisho kewan oltung'ani torrono.

²⁷Mme sidai tininya enaisho oo lotorok sapuk, metaa mitem aing'oru enkisisa sapuk.

²⁸Ore oltung'ani lemeeta enkibooroto e kewan, netiu anaa enkanasa natigilaki neing'uari meeta isunta.