Read Maasai Bible – Biblia Sinyati Ndung'eta e Rashe 27 Bible Online

Ndung'eta e Rashe 27 - Maasai Bible – Biblia Sinyati bible

Ndung'eta e Rashe 27

¹Miwuasa te nkaraki ine ntaaisere, amu miyiolo inaayooki ina olong ayau.

²Inchoo likae kisis iyie kake mme enkutuk ino makewan, olomoni, neme enkutuk ino.

³Ore osoit naa keiroishi, ore sii osinyai neiroshi, kake ore engoro olmodai neiroshi alang pokira.

⁴Egogong engoro napi, ore engoro nemutisho, kake aing'ae oidim aitasho te dukuya olom.

⁵Enaikash enkisikong'ata nikinchori naibala alang enyorrata naisudoro.

⁶Eisiligayu ilbaa likipik olchore, naa kumok ing'ututat olmang'atinta.

⁷Ore ilo otaraposhe naa keany enaisho oo lotorok, kake ore te ilo oata esumash, naa kedol ninye ina pooki nadua anaa kemelok.

⁸Anaa emotonyi nalo aing'uaa enkaji enye, neijia etiu oltung'ani olo aing'uaa enkang enye.

⁹Ore eilata o esonkoyo neitiship oltau, kake kepolos enyamali oltau.

¹⁰Ming'uaa olchore lino o olchore le papaai lino, nimilo enkaji olalashe lino te nkolong e ngolikinoto ino. Enaikash olelatia lino otaana, alang olalashe lino olakua.

¹¹Teng'ena enkerai ai nintiship oltau lai pee atum atawalaki ilo laaing'oru nanu aitukurru.

¹²Ore oltung'ani ng'en nedolu batisho neisudoo kewan; kake ore ilo omoda nelo adoiki netum enkitamioto.

¹³Iwa enkila oltung'ani te neitayio ajo kelak esile o lomoni, nimbung ninye to rorei le nkutuk enye nchere keitasheiki olomoni te sile.

¹⁴Ore ilo omayian ole latia enye to ltoilo sapuk, einyototo ayooki enasirie, naa keikenari aajo oldeket.

¹⁵Etiu enkitok e nchankar anaa oloirujuruj te enkolong e nchan.

¹⁶Ore tinimbok ninye netiu anaa tinimbok osiwuo aashu imbung emborei e ilata, te nkaina enye e tatene.

¹⁷Eii esekenkei aitipij esekenkei, neitipij oltung'ani o likae tung'ani.

¹⁸Ore pooki ng'ae oramat olng'aboli naa kenya ilng'anayio lenyena, naa ore ilo orrip olkitok lenye naa keyanyituni.

¹⁹Ore anaa enaibalunye enkare enkomom ino tining'or, neijia etiu endamunoto oltung'ani eutu ilo tung'ani enatiu.

²⁰Ore enemeneng'a o mutata nemeraposho aekata, nemeraposho aekata inkonyek o ltung'ani.

²¹Etemi enkosholai te moti, netemi saabu to lkokuet, netemi oltung'ani te nkisisa enye.

²²Ore hoo tinipurd olmodai te ntoki naidong'ishoreki, nindong ninye tenebo enkurma naidong'i, melo hoo emodai enye aing'uaa ninye.

²³Tayiolo katukul enaikununo intare inono, niramat nena kishu inono oleng.

²⁴Amu mebikoo taa enkarsisisho intarasi, naa ama kebikoo sii enkopiyia e nkitoo too ishoritin pooki intarasi?

²⁵Ore teneishunye nkujit nebulu kulie, nesotuni nkaitubulu oo ldoinyo,

²⁶nitum inkilani too lkuoo linono le kerra, nitumie nena kineji enkurma.

²⁷Ketumi kule nikibaiki too nkineji inono, neaku endaa o lmarei lino pooki o enintotiyie nkaisiaayiak inono.