Read Maasai Bible – Biblia Sinyati Ndung'eta e Rashe 29 Bible Online

Ndung'eta e Rashe 29 - Maasai Bible – Biblia Sinyati bible

Ndung'eta e Rashe 29

¹Tenikirerei anaake nintagol elukunya ino, niyiooki nabo olong agila, nimintoki aishiu.

²Ore te netii isupati enkitoria, naa keshipa iltung'ana, kake te neitoreisho iltorrok naa kenyamalu neing'unyung'uny olorere.

³Ore ilo onyor eng'eno nagut naa keitiship menye, kake ore ilo oitaa inkituaak naaibor onyek encholiek naa keishang'itie imasaa enyena.

⁴Te sipata eisho olaiguanani enkop enkitashoto, kake ore ilo oisimaa nkishoorot neidaikie enkop enye.

⁵Ore oltung'ani opakas ole latia enye, naa inkejek enyena eisalaashaka orreshet.

⁶Ore oltung'ani torrono naa keibung'i too ntorrok enyena, kake ore oltung'ani supat eranyisho neshipa sii.

⁷Ore oltung'ani supat neyiolo sipat eilo aisinani; ore oltung'ani torrono nemening'u ine ng'eno.

⁸Ore lelo asurdaanyak naa keinuaaki enkanasa enkima, kake kerriny iltung'ana ng'eni engoro napi.

⁹Tenelo neishankarra oltung'ani ng'en o lmodai, naa kegoro ake olmodai neitoki akueni nemegira.

¹⁰Ore iltung'ana ooata enkure o sarge naa keiba ilo lemeeta entioto neing'oru lelo torrok enkishui enye.

¹¹Ore olmodai naa keiro alimu engoro enye pooki, kake ore oltung'ani ng'en neitirring'a aibooyo.

¹²Ore te neinining olarikoni le nkop imbaa e lejare, naa keaku ilooitoreisho lenyena pooki torrok.

¹³Etumo olaisinani o ilo aironyani lenye tenebo; neisho Olaitoriani ninche pokira nkonyek enye ewang'an.

¹⁴Teneiguanare olaiguanani ilo aisinani te sipata, naa keitasheyieki enkitoria enye ntarasi.

¹⁵Ore eng'udi tenebo enkisikong'a e nkikoo naa keyau eng'eno nagut, kake ore enkerai natapalayioki naa keyaki ng'otonye enkurruna.

¹⁶Ore te nejing iltorrok enkitoria, naa keponari ntorrok, kake keanyu lelo supati aadolu embatatata enye.

¹⁷Toosho tarerioi enkerai ino tuutai naa aikincho ninye enkiyeng'iyeng; naa keisho enchipai oltau lino.

¹⁸Ore ine nemetii enaibon e Nkai nebatata iltung'ana amu meeta enasujita. Kake emayiana ilo oibung inkitanapat.

¹⁹Merere olaisiaayiani irorei ake le nkutuk, ore hoo duo nening'u, menyorraa aibung asuj.

²⁰Itodua oltung'ani okuetiki aimaki irorei lenyena? Eeta olmodai osiligi sapuk alang ninye.

²¹Ore tinincho osinka lino pooki toki nayieu te keraisho, niyiooki amaniki etaa olajung'oni lino.

²²Ore oltung'ani le ng'oro napi naa kedumu olarrabal, naa ore oltung'ani oata engoro naa keyau ntorrok kumok.

²³Keitadoyio olwuasa lo ltung'ani oltung'ani, kake ore ilo obor to ltau naa ketum enkanyit.

²⁴Ore ilo oitaa olapurroni encholiek naa keiba enkishui enye makewan; ening ilo deket, nemeeta entoki naibalie.

²⁵Ore euriata o ltung'ani neyau orreshet. Kake ore ilo oisilig Olaitoriani neserian.

²⁶Eing'oru ilkumok omom o loitoreisho, kake to Laitoriani etum oltung'ani esipata.

²⁷Ore oltung'ani leme asipani naa olminong te lelo supati, kake ore ilo oitoriori enkoitoi enye naa olminong te lelo torrok.