Read Maasai Bible – Biblia Sinyati Ndung'eta e Rashe 4 Bible Online

Ndung'eta e Rashe 4 - Maasai Bible – Biblia Sinyati bible

Ndung'eta e Rashe 4

¹Entoning inkiteng'enat e papaai linyi inkera aainei, nining'ining'i aasipu pee itumutumu aanoto eng'eno nagut.

²Amu kaaisho iyie iutarot sidain; miorore enkiteng'enata ai.

³Ore apa ara enkiti kerai nanana atii tenebo papa lai, naa nanu ake eeta yieyio.

⁴Naaiteng'ena papa lai nanu, naajoki, “Inchoo oltau lino eibung akurraki irorei laainei, tushuma inkitanapat aainei pee iton inchu.

⁵Mincho kirikino, nimimbelekenya aing'uaa irorei le nkutuk ai. Noto eng'eno nagut, noto sii ening'unoto.

⁶Mimenaa ninye, naa aikirrip ninye iyie; tonyora ninye naa aikirrip ninye iyie.

⁷Ore enkiterunoto e ng'eno naa ena; noto eng'eno nagut, naa ore pooki nitum, noto sii ening'unoto;

⁸tonyorra ninye oleng, naa aikintaa ninye iyie kitok; aikianyitu ninye iyie tininbung'are ninye.

⁹Kepik ninye endukuya ino enkishili e nkisisa nikipik sii enkopiyia sidai e nkitoo.”

¹⁰Toning'o enkerai ai, ning'amaa irorei laainei, pee etum ilarin le nkishui ino aataa kumok.

¹¹Aaiteng'ena nanu iyie nkoitoi e ng'eno; aatoriko iyie too nkoitoi naaitoriori.

¹²Ore pee ilo iyie, nemetum enkeju ino olkob, naa tinikuet nimirrorro.

¹³Imbung'a tukurraki iutarot, mincho kipuo aing'uaa; torripo ninche, amu ninye enkishui ino.

¹⁴Mijing enkoitoi oo larruok nimiim ina oitoi e lelo tung'ana torrok.

¹⁵Tapaasha ninye, milo aim ninye; imbelekenyunye tung'uai milo agiroo.

¹⁶Amu meidim ninche aairurata o metaasa entorrono; meeta ninche injo ometaba anaa nerrorr obo metabatatayu.

¹⁷Amu enya ninche endaa e nkarruoisho, neok enaisho oo sabibu naikonyuno te ngolon.

¹⁸Kake ore enkoitoi oo supati netiu anaa ewang'an e nkakenya, ina naponari awang'u newang'u o metaa dama.

¹⁹Ore nkoitoi oo ltorrok netiu anaa enaimin nagut; meyiolo ninche aajo aitenyoo etarrorrote.

²⁰Enkerai ai, inining'u tukurraki irorei laainei, irrugu enkiok ino inining'u inkikoot aainei.

²¹Mincho ninche kilany aaing'uaa enkomom ino; tushuma ninche tiatua oltau lino.

²²Amu enkishui ninche teilo otum ninche naa biyotisho o sesen lenye pooki.

²³Ing'ura oleng tagolie oltau lino, amu ninye epukunye inchorroi e nkishui.

²⁴Intalama kewan nkirorot torrok, nishurtu inkirorot torrok te iyie.

²⁵Inchoo inkonyek inono eing'or aaitoriokino dukuya; neaku enking'urata ino naitoriori te dukuya iyie.

²⁶Ing'ura tagolie enkoitoi oo nkejek inono, pee eunoyu inkoitoi inono pooki.

²⁷Nimiwuang alo tatene aashu kedianye; tushuku enkeju ino intung'uai entorroni.