Read Maasai Bible – Biblia Sinyati Ndung'eta e Rashe 5 Bible Online

Ndung'eta e Rashe 5 - Maasai Bible – Biblia Sinyati bible

Ndung'eta e Rashe 5

¹Enkerai ai inining'u tukurraki eng'eno ai, irrugu enkiok ino inining'u eng'eno ai.

²Pee itum atorripo te yiolounoto naiguana, ore enkutuk ino nerrip eng'eno.

³Amu ore enkutuk enkitok naibor onyek nemelok anaa olkenkei, ore ilomon lenyena nepuiyiapui aalang eilata;

⁴kake ore te nkiting'oto nedua anaa esayiet nepi anaa olalem opi imbat pokira.

⁵Ore inkejek enyena nepuo aadoiki keeya; nesujaa iroruat enyena enkoitoi e nemeneng'a;

⁶meshilaa ninye enkoitoi e puaan, eirrang'irrang inkoitoi enyena, nemeyiolo ninye.

⁷Neaku ore naa teina kata inkera aainei, entoning'oki nanu nimipuopuo aaing'uaa irorei le nkutuk ai.

⁸Intalama enkoitoi ino enenye nimilo anyikaki kutuk aji e nkaji enye;

⁹pee mincho ake enkisisa ino ilkulikae, nimincho ilarin linono lelo le meeta olng'ur,

¹⁰pee meiput ate ilomon te ngolon ino ore isiaaitin inono nepuo enkaji o lomoni.

¹¹Ore te nkiting'oto e nkishui ino ninchir, etumutaki inkiri o sesen lino,

¹²naa ijo, “Ekaiba apa enkitamioto naautarieki netanya oltau lai ererioroto!

¹³Eitu apa ainining'u oltoilo loo laiteng'enak laainei aashu airrugoki enkiok ai ilautarok laainei,

¹⁴atinyikaka apa nanu embata e nkidaaroto tiatua eumuta o lorere!”

¹⁵Tooko enkare naing'uaa enchorro ino makewan, ina are narukunye aing'uaa enchorro ino.

¹⁶Keidapasha inkonyek inono oo nkariak tiong'ota, inchorroi enkare too nkoitoi dapashi?

¹⁷Inchoo ninche eaku ininono aa iyie ake, neme pee eaku enino olomon likiboitare.

¹⁸Inchoo enchorro ino emayiani, nishipakino enkitok e lelero ino.

¹⁹Inchoo enyorrata enye kimput iyie, inkatitin pooki te nchipai, inchoo enyorrata enye kidumu anaake.

²⁰Aainyo enkerai ai pee incho enyorrata e nkitok naibor onyek kidumu? Nimbung olgoo le ntang'oroi?[2]

²¹Amu ore inkoitoi oltung'ani netii dukuya Olaitoriani, naa keing'orita ninye irrekiei lenyena pooki.

²²Ore enkarruoisho oo larruok naa kerresh ninye, neibung'i ninye te siaai oo ng'ok enyena.

²³Neye ninye meeta enkitamioto e utaroto, ore te nkaraki emodai enye sapuk neimina ninye.