Read Maasai Bible – Biblia Sinyati Olaikooni 10 Bible Online

Olaikooni 10 - Maasai Bible – Biblia Sinyati bible

Olaikooni 10

¹Ore ilojong'a ootuata neidim aaitong'ua eilata narropil. Naa ore enkiti modai neidimu eng'eno nagut o enkanyit.

²Ore oltau lo ltung'ani ng'en neboiniki ninye meitoriokinoyu esipata, kake ore oltau lo lmodai neboiniki entorroni.

³Ore doi ninye olmodai tenelo te nkoitoi, nemeeta endamunoto, naa ketayiolo pooki ng'ae ajo olmodai.

⁴Tenelo ake nikidumakino engoro e ilo oitoreisho, milo ake aing'uaa ewueji ino e siaai, amu ore nena torrok naa aikindimi aatapalaki tinigira aitirring'a.

⁵Etii enkarruoisho natoduaa tiabori enkolong, enkitarruoroto naing'uaa ilo oitoreisho.

⁶Eishori iltung'ana oomoda ilorikan le shumata; netoni lelo karsisi too wuejitin e abori.

⁷Atoduaa irrindiki ekedito imbartan nadol iltung'ana kituaak epuo too nkejek anaa irrindiki.

⁸Ore ilo otur engumoto nedoiki ninye; naa keony olasurai ilo otur elusie te suntai.

⁹Ore ilo oturu isoito naa kear isoito ninye; naa ore ilo oiper olchata nepik kewan bata.

¹⁰Tenaa ming'ani entolu ino, neitu iii ninye, neishaakino niponaa engolon oleng; kake eng'eno nagut naretu oltung'ani meisula.

¹¹Teneonyisho olasurai eton eitu esiri te ntaleng'oi, naa keaku pesho tenesiri eidipa atoonyisho.

¹²Ore irorei le nkutuk leilo ng'en, neisho ninye omom, kake ore enkutuk o lmodai nemut ninye.

¹³Ore enkiterunoto oo rorei le nkutuk enye naa emodai, naa ore enkiting'oto e nkiroroto enye naa olkuenyi torrono.

¹⁴Eponaa olmodai irorei oleng, hoo nemeeta oltung'ani oyiolo ajo ainyoo naaku, naa aing'ae oidim atoliki ninye ina naaku te siadi ninye?

¹⁵Ore eekenyata o lmodai neitanaur ninye, metaa meyiolo ninye ina oitoi nalo enkanasa.

¹⁶Oi iyie na kop, tenaa ore olaiguanani lino naa enkerai, ore ilkituaak linono nenya osirua lenye tadekenya!

¹⁷Ishipa iyie na kop, tenaa ore olaiguanani lino naa olayioni lo ltung'ani olakuno, ore ilkituaak linono nenya osirua te nkata naishaakino, te nkaraki eng'olon, neme te nkaraki emerai!

¹⁸Ore te nkaraki enturuaisho neurunye shumata enkaji, ore te nkaraki enchalan neo enkaji.

¹⁹Ore endaa neitobiraki te nkaraki enkuenia, ore enaisho oo sabibu neitiship enkishui, newal impisai pooki toki.

²⁰Midek ake olaiguanani, too ndamunot inono, nimidek to lgilata lirrag ilo karsis; amu ore imotonyi o loing'ang'e neya oltoilo lino, aashu eboloo kulie nyaun oo naipuko ina bae.