Read Maasai Bible – Biblia Sinyati Olaikooni 2 Bible Online

Olaikooni 2 - Maasai Bible – Biblia Sinyati bible

Olaikooni 2

¹Najoki nanu kewan to ltau, “Wou taata amu katem esidano o lkar; ntumurru, ndipakinoyu.” Kake atoduaa ajo ore sii ninye apa ena naa ene pesho.

²Atejo sii ena aimaki enkuenia “Ene modai”, ore olkar nemeeta enikintaas sidai.

³Aing'orua oleng te ndamunoto ai enaiko te naitiship osesen lai te naisho oo sabibu neton ake aarikito endamunoto ai arikoo te ng'eno nagut o enaiko te natum aibung emodai o metaba anaa nadol ina apa naji aisidai too nkera oo ltung'ana neas tiabori keper te nena kuti olong'i e nkishui enye.

⁴Ataasa isiaaitin sapuki; atesheta inkajijik, naunoki kewan inkurman oo sabibu

⁵naitobiraki kewan inkurman o wuejitin neeyeng'iyeng'areki, naun te ninche impukunot pooki oo lkeek loo lng'anayio.

⁶Naitobiraki kewan ilturot lapikie ina tim oo lkeek nabulu enkare.

⁷Ainyiang'ua irrindiki, ilewa o ng'oruo, naata apa irrindiki ootoiwuoki te nkaji ai; naata sii apa iluaat kumok oo nkishu o ntare, alang pooki ng'ae apa otii dukuya nanu te Yerusalem.

⁸Atushumaka sii kewan enkosholai o saabu o lchumati pooki loo laiguanak, loo lkirinen. Anoto sii ilaranyak, ilewa o ng'oruo o nkapiak kumok oleng, inkituaak kumok naayieu olee neeta.

⁹Metaa ataa apa kitok oleng nagiroo pooki apa laatii te dukuya te Yerusalem; naata ake sii eng'eno nagut tiatua nanu.

¹⁰Ore pooki nang'uar inkonyek aainei neitu alau ninche. Atipika oltau lai atua esikar, amu ore oltau lai nenoto esikar te eekenyata ai pooki, naa ena apa olekoisiaayio le nauri ai pooki.

¹¹Nalotu asipu nena apa pooki naataasa inkaik aainei o eekenyata nanoto aasita ina, nadol ajo ore pooki naa ine pesho naa osiwuo ake amirare, nemeetae hoo toki naata dupoto tiabori enkolong.

¹²Metaa aibelekenyakine aineneng eng'eno nagut o lkuenyi; kainyoo eas oltung'ani olotu te siadi olaiguanani? Ina ake naidipaki aataas.

¹³Metaa atoduaa ina ng'eno nagut ajo kelus te sidano emodai anaa enalus ewang'an te sidano enaimin.

¹⁴Kedol oltung'ani oata eng'eno nagut eneloito, kake ore olmodai nelo te naimin; nayiolo ake ajo etum pooki olbuket obo.

¹⁵Ina peyie ajoki kewan, “Ore ina natum olmodai naa katum sii nanu; Kainyoo naa peyie ataa nanu ng'en oleng?” Najoki kewan ore sii ninye ena naa empesho.

¹⁶Meetae oltung'ani odamu ilo ng'en, nemeetae olodamu olmodai, amu ore too nkolong'i naapuonu nerikinisho pooki. Keye ake ilo ng'en anaa ilo modai!

¹⁷Metaa aibayie apa enkishui amu ore nena naasi tiabori enkolong naa torrok te nanu; amu ine pesho pooki netiu anaa osiwuo ake emirareki.

¹⁸Ekaiba apa eekenyata ai pooki nateekenye tiabori enkolong tenadamu ajo kaing'ueki ninche ilo tung'ani olotu te siadi nanu,

¹⁹naa aing'ae oyiolo te naa keaku oltung'ani ng'en aashu olmodai. Naa keaku ake oloitore nena pooki natanyamalaka aasishore eng'eno ai nagut tiabori enkolong. Ore sii ninye ena naa empesho.

²⁰Metaa aibelekenye aisho oltau lai meiting'o osiligi too siaaitin pooki aainei nataasa tiabori enkolong.

²¹Amu ore tiaekata, ore oltung'ani otaasishe te ng'eno nagut o te yiolounoto o te nkarriyiano, neing'uaa pooki metishipakinoyu ilo leitu enyamaliki ninye. Ore sii ninye ena naa empesho naa entorroni sapuk.

²²Kainyoo eeta oltung'ani too siaaitin o enauri natum easisho tiabori enkolong?

²³Amu ore nkolong'i enyena pooki nebore emion, ore esiaai enye pooki naa oltau eiroshiyie; neijia ninye etiu kewarie meyeng'iyeng'a indamunot enyena. Ore sii ninye ena naa empesho.

²⁴Meetae entoki naikash te tung'ani alang te nenya neok netum enchipai te ekenyata enye. Atoduaa sii ena ajo inkaik e Nkai eing'uaa;

²⁵amu teneme Enkai aing'ae oidim ainosa aashu aing'ae oidim atishipakinoyu?

²⁶Ore ilo tung'ani oitiship ninye neisho Enkai ninye eng'eno nagut o eyioulounoto o eng'ida; kake ore olaing'okoni, neisho ninye ina siaai e sotore neiturrur peyie eisho ilo oitiship Enkai. Ore sii ninye ena naa empesho netiu anaa osiwuo ake emirareki.