Read Maasai Bible – Biblia Sinyati Olaikooni 3 Bible Online

Olaikooni 3 - Maasai Bible – Biblia Sinyati bible

Olaikooni 3

¹Ore te pooki toki neetae enkata enye, neetae enkata e pooki toki tiabori keper:

²Keetae enkata naini, neetae enkata naye, neetae enkata e unore, neetae enkata e nkesare.

³Keetae enkata naari metua, neetae enkata naishiunyeki; neetae enkata nagili, neetae enkata nasheti.

⁴Keetae enkata naishiri, neetae enkata nakueni; neetae enkata e nkishirata o sina, neetae enkata o sinkolio

⁵Keetae enkata nanang'ari isoito, neetae enkata naiturrurri isoito tenebo; neetae enkata naibung'ae aaitamuata inkaik, neetae enkata nemeibung'ae aaitamuata inkaik.

⁶Keetae enkata naing'oruni, neetae enkata naiminieki, neetae enkata nashumi, neetae enkata naiturrarri.

⁷Keetae enkata napolosi, neetae enkata naripi neetae enkata nagirae, neetae enkata nairori.

⁸Keetae enkata e nyorrata, neetae enkata e nkiba; neetae enkata o larrabal, neetae enkata e seriani.

⁹Kainyoo dupoto natum olaisiaayiani te eekenyata enye?

¹⁰Atoduaa ina siaai naishorua Enkai aisho nena kera e tung'ani metanyamaliki ninche.

¹¹Eitaa ninye pooki toki sidai te nkata enye; netipika ninye tung'ani yieuna nayiolounye mbaa neitu easa, ore etiu neijia nemeidim ninye atayiolo ina nataasa Enkai te nkiterunoto o metabaiki enkiting'oto.

¹²Ayiolo ajo meetae ae toki sidai te ninche alang teneitiship ate neng'ida too nkolong'i pooki naaishu ninche.

¹³Enkishooroto sii e Nkai to ltung'ani nchere ore pooki ng'ae nenya, neok, neisikarra te ekenyata enye pooki.

¹⁴Ayiolo ajo ore pooki naas Enkai neitashe ntarasi; meetae ae toki naponikini ninye; nemeetae toki naiwuang'ieki te ninye; eitaa Enkai metotiwuo neijia, peyie etum iltung'ana aatureita ninye.

¹⁵Ore ina natii, netii apake, ore ina naitoki atii, netii apake, neing'oru Enkai ina naterewaki aaitalamaa.

¹⁶Ore tenebo ina atoduaa ake sii tiabori enkolong teine wueji neutarieki esipata ajo etii ake sii ninye ine nkarruoisho, ore ine wueji e supatisho, netii ake sii ninye enkarruoisho.

¹⁷Najo tiatua oltau lai, ekeiguanare Enkai lelo supati neiguanare lelo torrok, amu etegelua ninye enkata te nkaraki pooki toki, o pooki siaai.

¹⁸Najo to ltau lai tenena naaipirta nkera oo ltung'ana inchere Enkai natemita ninche pee eitodol ninche nchere ing'uesi ninche.

¹⁹Amu ore eneiting'oki iltung'ana naa ninye sii eiting'oki ng'uesi; ore anaa enaye nabo neye ake sii ninye enkae. Keeta pooki enkiyang'et nabo nenyaanyuk, nemeeta oltung'ani enelang'ie nena ng'uesi; amu ore pooki naa empesho.

²⁰Epuo pooki ewueji nebo; amu enterit eing'uaa pooki nerrinyokino pooki enterit aaigil.

²¹Aing'ae oyiolo tenaa ore enkiyang'et oltung'ani neilep alo shumata, ore enkiyang'et eng'ues nelo abori atua enkop?

²²Metaa atoduaa ajo metii toki naikash alang teneshipakino oltung'ani esiaai enye, amu ina doi esiaai enye; aing'ae oidim ayau ninye metoduaa imbaa naasuju ninye eidipa atua?