Read Maasai Bible – Biblia Sinyati Olaikooni 7 Bible Online

Olaikooni 7 - Maasai Bible – Biblia Sinyati bible

Olaikooni 7

¹Enaikash enkarna sidai alang eilata nagol enkinyang'a; neikash enkolong nitua alang enkolong apa nikitoiwuoki.

²Enaikash tinilo ina aji nabore olkiyioi, alang tinilo ina aji o sirua, amu ena enkiting'oto e pooki tung'ani. Nenare neshum lelo ooishu ina too ltauja.

³Enaikash osina alang enkuenia, amu to sina o enkiroishi o ltau eitishipi oltung'ani.

⁴Ore oltau le ilo ng'en, netii atua ina aji, olkiyioi; kake ore ilo tau loo lmoda netii ina aji e nkuenia.

⁵Enaikash oltung'ani oning enkisikong'ata eilo ng'en, alang tenening osinkolio loo lmoda.

⁶Ore anaa enadar ilkiku einosita enkima tiabori e moti, neijia etiu enkuenia e lelo moda; ore sii ninye ena naa empesho.

⁷Kesipa ore enkitorogonyata neitomod oltung'ani ng'en, naa keinyal eropare oltung'ani indamunot.

⁸Enaikash enkiting'oto entoki alang enkiterunoto enye; neikash ilo ong'iri to ltau alang ilo owuasa to ltau.

⁹Migoro asioki, amu ore engoro neirrag to lgoo loo lmoda.

¹⁰Mijo ake, “Kainyoo apa pee eikash inkolong'i naatulusoitie te kuna?” Amu mme te ng'eno inkilikuanu ena.

¹¹Aisidai eng'eno etiu anaa enjung'ore naa dupoto te lelo ooishu.

¹²Amu ore erripoto e ng'eno nagut netiu anaa erripoto oo mpisai; naa ore dupoto e yiolounoto naa ina ng'eno nagut nagolie ina kishui eilo oata.

¹³Tadamu esiaai e Nkai: aing'ae oidim aitorioi ina naidipa atakordilo?

¹⁴Ore teina olong ninoto karsisisho, ting'idayu; ore teina olong e nyamali nidamu Enkai naitobira obo anaa olikae, metaa metum oltung'ani ae toki nalotu asuju ninye.

¹⁵Ore te nkishui ai e pesho, natoduaa pooki toki; eetae oltung'ani supat orrorri te sipata enye, neetae oltung'ani torrono oitoodor enkishui enye te yasata enye torrono.

¹⁶Miaku supat aitulus, nimintaa sii kewan ololus te ng'eno, ainyoo peyie imut kewan ainyal?

¹⁷Miaku sii olarruoni aitulus, nimiaku sii olmodai; ainyoo pee iye iyie eng'or enkata ino?

¹⁸Enaikash tinimbung ena akurraki, ore teina nimimuat enkaina ino; amu ore ilo oure Enkai nepuku tenena pooki.

¹⁹Keisho eng'eno engolon ilo tung'ani ng'en alang ilaiguanak tomon ootii atua enkanasa.

²⁰Kesipa meetae te nkop oltung'ani supat oas isupati nemeas aekata ing'ok.

²¹Mishilaa nena baa pooki naajo iltung'ana, pee melo ake nining osinka lino kidekita iyie;

²²neyiolo oltau lino ajo ore too nkatitin kumok nitedia sii iyie ilkulikae.

²³Atetema kuna pooki te ng'eno nagut; najo, “Ekaaku ng'en”, kake ekaalakuaniki apa nanu.

²⁴Ore ina natii, naa kelakua oleng negut, kegut oleng; aing'ae oidim anoto?

²⁵Naibelekeny endamunoto ai ayiolou naing'oru aturu naing'oru eng'eno nagut o esiana oo ntokitin, nayiolou nena torrok e modai o ina modai aa ninye olkuenyi.

²⁶Natum emion oleng alang keeya teina kitok naa ore oltau lenye naa orreshet oibung'isho, naa ore inkaik naa entoki naibung'isho; ore ilo oitiship Enkai neilany ninye, kake ore olaing'okoni neya ina kitok ninye.

²⁷Ng'ura, ena nanu airrasha, ejo olaikooni, intushulaki entoki enkae peyie itum esiana enye,

²⁸naa ninye eing'orua endamunoto ai aigil neton ake eitu atum. Oltung'ani obo anoto tiatua enkalifu kake eitu atum enkitok te pooki.

²⁹Airrasha nanu ena: inchere eitayio Enkai oltung'ani meitasho te nkitashoto sidai, kake eing'orutua ninche inkoitoi kumok nemesipa.