Read Maasai Bible – Biblia Sinyati Osinkolio le Solomon 1 Bible Online

Osinkolio le Solomon 1 - Maasai Bible – Biblia Sinyati bible

Osinkolio le Solomon 1

¹Osinkolio loo sinkolioitin laa ole Solomon.

²Oi duoo tenaa aiking'utut too ng'ututata e nkutuk ino! Amu ore enyorrata ino nelang enaisho oo sabibu.

³Ore iila inono naaputishoreki naa kerropil oleng, ore enkarna ino naa eilata nabukuno; metaa aikinyor iyie intoyie.

⁴Iwaki nanu tenebo iyie matasiooi aaipirri. Aayawua nanu Olaiguanani atua ilgilat lenyena, aikishipa niking'ida tenebo, nikishipakino enyorrata ino aaitalang enaisho oo sabibu, ina pee kinyor ninche pooki!

⁵Kara oltung'ani orok oleng, nara sii sidai, natoyie e Yerusalem, atiu anaa lelo ng'oborri le Kedar, anaa lkarash le Solomon.

⁶Mayieu niking'or nanu to lmena te nkaraki narok, amu aainosa enkolong oleng. Ore ilayiok le yieyio naatagorokinote nanu, aaitaa ninche nanu olaramatani loo sabibu; kake ore osabibu lai makewan neitu aramat!

⁷Tolikioki iyie nanu, iyie ilo onyor oltau lai, Ine nirritayie imasaa inono, Ine nincho meirraga enaipirie enkolong; kainyoo peyie atiu anaa obo oloolo lemeeta enetii te mbata oo nkerrai e kulikae shekuti?

⁸Tinimiyiolo iyie, iyie nara sidai tiatua nkituaak, Tusuja irrekiei le nena kerrai, nilo airrita ilkuoo linono, te mbata oo lng'oborri loo lchekuti.

⁹Aaitanyaanyukie nanu iyie enanyor ai, embarta oo ngarrin e Farao.

¹⁰Aisidain ntakul inono edou imuna, naa sidai emurt ino ebore imasaa.

¹¹Aikintobiraki iyiook iyie imasaa e saabu, naaripakino enkosholai.

¹²Ore apa ina kata eirrag olaiguanani to lorika lenye dapash, neitorropil esonkoyo ai ine.

¹³Ore olanyor lai netiu anaa embene e nkorropil te nanu, ina nairrag te mpolos oo lki laainei.

¹⁴Ore olanyor lai netiu te nanu anaa entukus oo ntapuka, tiatua enkurma oo sabibu e En-gedi.

¹⁵Ng'ura ajo ira iyie sidai enanyor ai, ng'ura ajo ira sidai; ore nkonyek inono netiu anaa ine nturkuluo.

¹⁶Ng'ura ajo inkishiaan iyie, olanyor lai, esipa ira sidai. Ore olorika lang dapash naa kenyori.

¹⁷Ore mbokishi e nkaji ang naa iltarakua, ore irishinani naa olchani onyaanyukie oltarakuai.