Read Maasai Bible – Biblia Sinyati Osinkolio le Solomon 6 Bible Online

Osinkolio le Solomon 6 - Maasai Bible – Biblia Sinyati bible

Osinkolio le Solomon 6

¹Kaji eshomo ilo lino linyor, iyie enaisul inkituaak? Kaji eibelekenyakine olinyor lino alo, pee kitum iyiook aaing'oru ninye tenebo iyie?

²Etadoyie olanyor lai alo enkurma enye, ine neitobirieki isonkoyoni, alo airrita eluaata oo ntare enyena too nkurman, nesotu ntapuka.

³Ara nanu eno lanyor lai, ore olanyor lai naa olalai; eirritita ntare enyena too neetii intapuka.

⁴Ira iyie sidai anaa Tirsa, olanyor lai ira sidai anaa Yerusalem, keitureisho anaa enjore naata inankan.

⁵Imbelekenya inkonyek inono intung'uayioki, amu kaaitanyamal ninche nanu, ore ilpapit linono netiu anaa eluaata oo nkineji, naadou to loshong'ishong'i le Gilead.

⁶Etiu ilala linono anaa eluaata oo supeni e kerra, nena naaetuo aailepu te nkisujata, neeta pooki ilmao, meetae nabo natua olkuoo.

⁷Ore ntakul inono netiu anaa isashat o lng'anayioi oji kukumanka, tiatua ina arasha naimulumulieki enkomom.

⁸Eetae inkaiguanak ntomoni ile, neetae nkapiak intomoni isiet, o nkaisiaayiak nemeikenayu.

⁹Na turkuluo ai, enemeeta eleyiata ai, naa nabo ake, ina nanyor ng'otonye enye, ina kirotet te ng'otonye. Etoduaa ninye nkaisiayiak neipot ninye aajo enashipa; ore nkaiguanak o nkapiak neisis sii ninche ninye.

¹⁰“Aing'ae ele otiu enduaata enye anaa entadekenya, newang anaa olapa, anaa enkolong, neitureisho anaa enjore naata inankan.

¹¹Atadoyie alo ine netii enkurma oo lng'anayio aing'or nena tapuka naatii oerata, aing'uraa tenaa keimarrimar ilkeek loo sabibu, tenaa keitapuka ilng'anayio ooji kukumanka.

¹²Ore apa eton mayiolo naayau oltau lai, tiatua engarri oo mbartan te mbata olkitok lai.”

¹³Tushukunye, tushukunye iyie lo Shulami, tushukunye tushukunye pee kitum aing'ura iyie. Ainyoo peyie ing'or iyie ilo Shulami, anaa oloipidipid aiguran te dukuya injorin are?