Read Maasai Bible – Biblia Sinyati Eng'eno nagut e Solomon 10 Bible Online

Eng'eno nagut e Solomon 10 - Maasai Bible – Biblia Sinyati bible

Eng'eno nagut e Solomon 10

¹Eng'eno natorripo oltung'ani le dukuya otipikaki enkop, nelaku ninye too ng'ok

²neisho engolon naitoreyie pooki toki natii enkop.

³Kake etii apa oltung'ani arruoni otung'uayie eng'eno, neinyal ninye kewan aar olalashe lenye te nkaraki engoro.

⁴Ore te nkaraki eng'oki, neewuo oloirrag le nkare enkop kake nesaru eng'eno ninye, nerikoo oltung'ani supat te masaai e mbaoi.

⁵Ore apa enyamal iloshon too mbaa enye arruok, negeluu eng'eno oltung'ani supat neitaa aminin te dukuya Enkai. Neisho ninye engolon naureyunye inkitanapat e Nkai hoo nenyorr olayioni lenye.

⁶Etasarua eng'eno oltung'ani supat egira ilarruok aaye, neilany enkima natadoikio inkanas imiet.

⁷Eton apake eibala olmonekie loo ntorrok enye, ketoyio enkop teine nepuru, neisho ilkeek aaiu ilng'anayio lemeku aikata, neitashe osoit le munyan teine, enkitadamunoto oltung'ani otanya eiruk.

⁸Etemenaitie iltung'ana leina kop eng'eno, nemeyiolo aatirish isidan o ntorrok, neton ake eitadamu iyiook lelo monek le nena anas emodai e lelo tung'ana pee merikinisho aikata ina modai enye,

⁹kake etasarua eng'eno lelo ooisiaayia ninye.

¹⁰Etii apa oltung'ani obo supat oilanya engoro o lalashe lenye nerikoo eng'eno aitobiraa. Neitodol eng'eno enkitoria e Nkai neitayiolo intokitin sinyat, neitaa ninye karsis neisho dupoto te siaai enye.

¹¹Ore pee eikonyaa ilarruok imasaa enyena, nebik eng'eno te nkalo enye neitaa karsis.

¹²Nerrip eng'eno too lmang'ati lenyena ooing'oru enkata naarie. Neisho emirishoi te olarrabal sapuk pee eitayiolo nchere meetae aitoki nitaa oltung'ani kitok neme enkisiaayiata e Nkai.

¹³Eetae apa oltung'ani supat otimiraki aaya sinkaisho kake eitu eingu'aa eng'eno ninye, nemitiki ninye eas eng'oki, nelo jila o ninye,

¹⁴ore etii jila neitu eing'uaa ninye ometaba anaa neisho ninye metaa olaiguanani loo ltung'ana apa ooitorogonya ninye. Neiko eng'eno metayiolouni nchere keitenikiaki apa ineitu eas, neisho meanyiti oleng.

¹⁵Eitayio eng'eno iltung'ana sinyat nebor te nkaina e sinkaisho.

¹⁶Etijing'a atua oltau lo ltung'ani obo le Nkai negilunore ilaitoriak too mbaa o lmonek le nking'asia.

¹⁷Neisho iltung'ana le Nkai olerrinyore te nkaraki ngolikinot naaimaitie. Nerikoo te nkoitoi natii ntokitin e nking'asia te oloip dama o to lakira oishu te nkewarie.

¹⁸Nerikoo ninche aimie empolos e naiposha nanyokie,

¹⁹kake neiko ilmang'ati meewa enkare nenang'u iseseni lenye imbat e naiposha.

²⁰Ina naa pee eikonyarie isupati ilarruok, nerany aaisis enkarna ino sinyati, Olaitoriani nerany pooki kisis iyie amu itomituo ninche.

²¹Eishoo eng'eno enkidimata lelo lemeiro meiroro, neiko inkera kutiti meiroro aaitobiraki.