Read Maasai Bible – Biblia Sinyati Eng'eno nagut e Solomon 11 Bible Online

Eng'eno nagut e Solomon 11 - Maasai Bible – Biblia Sinyati bible

Eng'eno nagut e Solomon 11

¹Eng'eno naishoo inkera oo Siraeli emirishoi eimu oloiboni sinyati.

²Etudung'o ninche olpurkel lememanya neitayu ilng'oborri lenye too wuejitin neitu aikata emanyi.

³Etaarare ilmang'ati lenye nemir lelo otekeshare ninche.

⁴Ore pee etum ninche enkure neipot enkarna ino neishori ninche enkare napuku te ndapidapoi.

⁵Ore ilbuketa oonoto Ilmisiri netum dopoto inkera inono to nyamalaritin enye.

⁶Apal enaruko enkare olkeju nasila, neruko enkare olkeju lo sarge,

⁷anaa enkitamioto te nkaraki natara ninche inkera kutiti, nirriwaki ninche enkare sapuk nabo kata

⁸nintodolu te nkure naata ninche ina kata eninkuna pee intame ilmang'ati linono.

⁹Ore pee etemi hoo naa kegirae ake aaisho enkanyit neyiolou eneikunaki ilarruok pee eitamei te ngoro.

¹⁰Itetema inkera inono anaa enaaikok menye enkerai enye, kake etudung'oko ilmang'ati enkiguana anaa olaiguanani opi.

¹¹Negoliki ninche, iloolakuaniki iltung'ana linono aashu ilootaanaki.

¹²Neponari enyamali enye, neishirr edamu nena naataasate.

¹³Ore pee eyiolou aajo eeta enkitamioto enye ene dupoto too ltung'ana linono, neyiolou sii aajo enkias ino Olaitoriani.

¹⁴Etanyaita Ilmisiri ilo tung'ani apa otang'asaki aiturraa aa enkerai, kake ore pee esidanu imbaa neing'asiakino ninye pee eibung ninche enkure sapuk.

¹⁵Eterewa entorroni enye metaasa imbaa nemeishiaa nepuo aaserem ilasuriaa o kulie ng'uesin naaiduruk, nirriwaki ninche ing'uesi nemeeta dupoto meitamio ninche

¹⁶neitayiolo ninche nchere ore enkitamioto oo ng'ok nenyaanyuk o eng'oki kewan.

¹⁷Engolon ino Olaitoriani naitobirua enkop too ntokitin nemeibala, anaata ninye apa irriwaka lelo tung'ana ilng'atunyo aitame.

¹⁸Indim sii apa aitobira ing'uesi naapi neitu aikata edoli naaitayu enkima neyang'u empuruo sapuk aashu eitayu ilakirr le nkima too nkonyek enye.

¹⁹Mme eji kear ake nena ng'uesi iltung'ana, kake ore ninye tenedol iltung'ana ninche neye to olkirutoto.

²⁰Ore eyia, keidim iltung'ana aatuata te nkiyangata nabo tenesuj esipata neisardaka te nkiyangata e ngolon ino. Kake itipika iyie intokitin pooki te nkineneng'ata o te nkiroishi naishiaa.

²¹Kake eyieuna ino o engolon ino pee intodolu engolon ino naa aing'ae naidim atetema engolon e nkaina ino.

²²Ore too nkonyek inono netiu enkop anaa enkantererai, netiu anaa olkitong'ati obo le nkoileelio le nkakenya.

²³Kake iyata iyie olng'urr te pooki aimindim pooki, imenaa iyie ing'ok ang nincho iyiook erishata nikirridunye.

²⁴Inyorr iyie intokitin pooki naatii, nimimba hoo toki nintobirrua, anaata eitu intobiru hoo toki teniminyor.

²⁵Kaji eiko hoo toki pee eishu teneme eyieuna ino? Kaji eiko toki pee eitoki atii teneme iyie oitengelaa?

²⁶Inchoo iyie intokitin pooki metaa keishu, amu ninonok, iyie Olaitoriani onyor ilooishu.