Read Maasai Bible – Biblia Sinyati Eng'eno nagut e Solomon 13 Bible Online

Eng'eno nagut e Solomon 13 - Maasai Bible – Biblia Sinyati bible

Eng'eno nagut e Solomon 13

¹Ore pooki ng'ae lemeyiolo Enkai naa olmodai. Keing'or ninche intokitin sidain naatae nemeyiolo ninche Enkai. Ketem ninche aayiolou nena tokiting pooki naatobirua Enkai kake meyiolo oloitobirua ajo aing'ae.

²Kejo ninche ke nkima, osiwuo aashu ilakir aashu enkare naruko aashu imasaa o loing'ang'e nkaitin naaitore enkop.

³Etishipakinote iltung'ana kuna tokiting ometaa kejo ninche ke nkaitin kake nchoo eyiolou inchere keeta kuna tokiting oloitore naa aikitok ninye alang pooki amu ninye olaitobirani loo sidain,

⁴naa tenaa keing'asia te ngolon o esiaai enye nchoo eyiolou aajo ore ilo oitobirua ninche neeta engolon sapuk oleng.

⁵Ore pee kiyiolou nchere aisapuk naa sidai enkitobirunoto e Nkai naa aikiyiolou Olaitobirunoni lang enatiu.

⁶Kake ebaiki nemeeta kulo tung'ana ae leyiata. Ebaiki netetema oleng aaing'oru Enkai nelau.

⁷Ore emanita intokitin e Nkai netoni ninche aajurr ometejo maate ore amu aisidain nkaitin ninche,

⁸kake ore eyia eton ake eeta kulo tung'ana entiyoto.

⁹Teneeta apa ninche engolon metaa keidim aatayiolo nena naasa to loing'ang'e kainyoo pee eitu eyiolou Olaitoriani oitore pooki toki.

¹⁰Ilmoda aaisul lelo oopik osiligi lenye intokitin nemeishu, ooserem intokitin naaitobira iltung'ana too nkaik, saabu o enkosholai naaitobiraki te nkarriyiano aaitanyaanyukie ng'uesi, aashu osoit lemeeta tipat otaguetaki te musano.

¹¹Ore oladung'oni loo lkeek naa kedung olchata oishiaa neitayu inkopit eilo shani neguet abaraki aitayu emasaai naishiaa,

¹²neitoki adumu nena kiperrat naatelekunye neitaa ilkeek le nkima neyerie endaa nashipakino.

¹³Keidim sii atudumu enchoto eilo shata nemeeta tipat, enchoto nakordilo nemesipa, neya nerere abaraki te rishata enye neitaayu enkitanyaanyukoto oltung'ani

¹⁴aashu ene nkiti ng'ues nemeeta tipat. Neelie orangi[2] odo aitemoo[3] nenen pooki nemesidain,

¹⁵neitobiraki ewueji sidai te suntai neoshoki aibung'ie too lmushumaani.

¹⁶Neing'or oleng pee mesulari ake amu keyiolo ajo enkitanyaanyukoto naguetuno nemeidim atareto kewan,

¹⁷kake meure atoomono ena toki neliki inyamalaritin enyena naaipirta imaasaa enyena, kiama o inkera, menya isura eirorie entoki nemeishu.

¹⁸Meeta ina toki engolon kake keserem ilo tung'ani biyotisho o sesen, nemeishu kake keomon ninye enkishui. Meeta eng'eno kake keomon eretoto nemelo kake keomon metorikoi te lototo.

¹⁹Neomon dupoto enkinyang'are, teina nemeeta ninye engolon too nkaik.