Read Maasai Bible – Biblia Sinyati Eng'eno nagut e Solomon 14 Bible Online

Eng'eno nagut e Solomon 14 - Maasai Bible – Biblia Sinyati bible

Eng'eno nagut e Solomon 14

¹Enking'asia aitoki oltung'ani odung'ito enaiposha oing'orunye eretoto encheta nanguetuno nemeishu nemegol sii alang ina meli nalotie.

²Eitobirua oltung'ani emeli pee eing'orunye dupoto, neitobiru olaitobirani te ng'eno sapuk,

³kake enking'urata ino iyie Papa narikoo, inchoo iyie iyiook enkoitoi te naipopsha nicho iyiook enkoitoi te mpolos oo lopirr le naiposha.

⁴Kepuo iltung'ana enaiposha hoo nemeeta eng'eno naarie enkare kake isaru iyie ninche te nyamali pooki.

⁵Eyieunoto ino paa ore pooki toki nintobirua te ng'eno ino neasishoreki, neaku kelang iltung'ana enaiposha te mpeut neitoki aashukunye enetoyio.

⁶Ena apa nataase tiapa pee emuta inapa nkukuni[4] naawuasa, ore olapa siligi le nkop neisik te mpeut irikoo iyie ninye neing'ueiki enkop eishoi ng'ejuk naitubulaa eishoi.

⁷Ketii apa emayianata ina peut e Noa, kecheta nayawua enjeunoto?

⁸Kake ore ina kitanyaanyukoto naguetuno naa kediaa nediaa ilo oguetu amu keitobiru entoki nainyiala neipot ajo enkai.

⁹Ore iltung'ana lemeyiolo Enkai o nena tokitin o lminong naaitobir naa keiba Enkai,

¹⁰naa keitame Enkai ina toki o ilo otaasa.

¹¹Neaku kedoiki Enkai aiguan nena kitanyaanyukot amu ore hoo duoo neitobiruaki te ntoki naa Enkai naitayio openy keaku ninche ntokitin torrok oleng naaiken iltauja loo lmoda.

¹²Eiterua apa enkiborra oo nkonyek pee eiteru eseremare oo nkaitin naaguetuno. Einyiala indamunot oo ltung'ana anaa netumi.

¹³Meetae apa ake inkaitin naaguetuno nemebik sii intarasi.

¹⁴Eng'idai e tung'ani nayawua nena aitin enkop naa ina pee eitaikiaki ninche enkidaaroto nasieku.

¹⁵Eetae apa olpayian oisinanue oleng pee eye enkerai enye, neitobir enkitanyaanyukoto naguetuno eina kerai enye, neisho enkanyit oltung'ani otua anaa enkai enye neitaiki ilasarri o siruai te lelo ootii abori ninye.

¹⁶Ore te siadi neponari ele kuaak torrono ometaa enkitanapata nchere ore nkaitin naaguetuno neseremi te nkitanapata oo larikok.

¹⁷Neaku ore iltung'ana oomanya enelakua lemeidim aaishoo olarikoni lenye enkanyit kake neyieu neisho ilo arikoni enkanyit, nedamu enayia neitobiraki enkitanyaanyukoto.

¹⁸Neiko lelo aitobirak loo nena kitanyaanyukot meibulai ilo kuaak too lelo tung'ana lemeyiolo olaiguanani.

¹⁹Keyieu naaji olaitobirani neitiship olarikoni lenye neitobiru enkitanyaanyukoto sidai alang ilo arikoni kewan.

²⁰Nenyorru iltung'ana ina siaai oo nkitanyaanyukot ometaa keserem oladuoo tung'ani laa ore apa te dukuya naa oltung'ani ake te ninche.

²¹Neaku ele kuaak orreshet torrono amu ore iltung'ana oonyamal aashu ootii abori erikore naironyisho nedumu nena masaa naaguetuno aaisho enkanyit naishiaa Enkai ake.

²²Neitoki imbaa aainyiala pi, nepong'ori iltung'ana aaku meyiolo Enkai, nebik aas intorrok ejo ninche eseriani te modai enye.

²³Eteyiang'a ninche inkera enye too lassari lenye loo nkurrat neas isiruai lo loiriruani loo mbaa naapaashari.

²⁴Etapalaitie enkishui enye nemenaa kiama enye, kear oltung'ani olikae to losek aashu eitame aloloitore enkitok enye.

²⁵Ore pooki toki naa enkiwuyiawuy o keeya, empurrore imongo, eropare, iltung'ana lemeisiligayu, olarrabal,

²⁶enkitorogonya oo ltung'ana supati, iltung'ana lemeeta enashei, iltung'ana lemeeta enkanyit o eloloito.

²⁷Eseremare oo nkaitin naaguetuno nemeipoti inkarn enye ninye enkiterunoto nayau enkiting'oto pooki e ntorroni.

²⁸Ore iltung'anak ooserem neinyiala ilukuny aashu elimu imonko aashu ebik te nkishui torrono aashu enya ilmuma loo monko medamu.

²⁹Kelimu imonko einosa ilmuma nemeitamei amu ore nena aaitin naaguetuno nemeeta enkishui.

³⁰Kake keinepu kenya ake enkitamioto amu etemenaitie ninche Enkai neserem inkaitin naaguetuno, nemenaa sii esinyatisho, nenya olmumai too mbaa oo monko aalej iltung'ana.

³¹Ore pee eas ilarruok ing'ok naa keari neme te ngolon eina nainosie ninche ilmuma kake te nkitamioto naishiaa ilarruok.