Read Maasai Bible – Biblia Sinyati Eng'eno nagut e Solomon 16 Bible Online

Eng'eno nagut e Solomon 16 - Maasai Bible – Biblia Sinyati bible

Eng'eno nagut e Solomon 16

¹Neaku keishiaa pee eitamioki kulo tung'ana anaa enaishiaa too nena ng'uesi kumok,

²kake eitu iyie intame iltung'ana linono teina oitoi intoduaa ninche olng'ur. Irriwaka ninche inkurlen naainosa, endaa sidai nemetumoyu aaishe esumash.

³Inkuna iyie neijia paa ore lelo aseremak loo nkaitin nemeidim aainosa nena ng'uesi naajo ninche keiduruk. Enoto iltung'ana linono esumash te nkiti rishata, nincho endaa.

⁴Keishiaa apa pee enyamalu lelo aitorogonyak pee edol iltung'ana linono enkitamioto nagirae aaiteme lelo mang'ati.

⁵Ore pee erasaki iltung'ana linono ilasuriaa torrok near ninche te sayiet nadua, neitu iyie igoro oleng amut iltung'ana linono.

⁶Etobiko ena nyamali te nkiti rishata pee eaku enkitamioto, nincho ninche ina kitanyanyukoto o lasurai lo suyai pee intadamu ninche enayieu inkitanapat inono.

⁷Teneing'or oltung'ani ina kitanyaanyukoto neishiu, mme te nkaraki eina natoduaa kake amu iyie Olaitajeunoni lang.

⁸Ore te nkaraki nitaasa ina, intoduaa ilmang'ati lang inchere iyie oitajeu iltung'ana too ntorrok pooki.

⁹Etuata ilmang'ati lang too onyot oo lmaat o lojong'a neitu etumi embaata enye amu keishiaa apa pee eitamei too nena ng'uesi.

¹⁰Meeta enaitaasa ilasuriaa torrok iltung'ana linono amu ing'urrie iyie ninche ninchiunye ninche.

¹¹Eitamioki pee etum aatadamu inkitanapat inono kake nesiokini aasaru pee mikirikino iyie katukul nerikino olng'ur lino.

¹²Meetae hoo olchani oishiunye ninche. Engolon ino Olaitoriani naishiunye iltung'ana pooki ninye naishiunye ninche.

¹³Iyata iyie engolon e nkishui o keeya, indim aitaa oltung'ani olmeneng'ani nintoki aitopiu.

¹⁴Keidim oltung'ani arruoni atara olikae kake meidim atushuku ina kishui aashu atalaku oltau oteenaki te nemeneng'a.

¹⁵Meetae oltung'ani likilany iyie.

¹⁶Ing'ura lelo tung'ana arruok, kitanya ninche kishilaa anaa Enkai nintame iyie ninche te ngolon ino kitok. Etaarare ninche ilopir le nchan o enkinuku nemut sii enkima katukul.

¹⁷Ore entoki e nking'asia naa enkima natopuaa te nkare oshi naar enkima. Kerrip engolon pooki o loing'ang'e lelo supati.

¹⁸Ore te nkata nabo neye enkima pee mear nena ng'uesi naairriwuaki metaara lelo arruok pee edol lelo arruok aajo kesujita endung'okinoto oo ng'ok.

¹⁹Ore te nkae wueji nepok ina kima oleng alang enkima natii enkare nepej endaa e nkop o lelo arruok.

²⁰Eitu apa emut ele meitai inkera inono, inchoo ninche endaa oo lmalaika, intadoikio ninche emukate te keper nao pee enya neitu eekenya. Eitishipa ina mukate pooki ng'ae.

²¹Keitodolu ena nchere ainyor naa ing'or inkera inono. Eitaraposho ina daa pooki ng'ae, neibelekenyaki pee eishiaa pooki ng'ae.

²²Eitu apa eshol enkima ina daa hoo nenyaanyukie osoit le nkare pee eitodol iltung'ana linono nchere ore ina kima natumuta endaa oo lmang'ati lenye te nkata e nchan sapuk o enkinuku,

²³neibooyie engolon enye pee etum iltung'ana linono supati endaa.

²⁴Intobirua iyie enkop pooki te ngolon ino niasishore engolon ino pee intame iltorrok, ore to lng'ur neborru lelo likisilig iyie.

²⁵Neibelekeny enkop kewan te nkoitoi naje pee eitodolu ajo idamu to lng'ur lelo likidamu iyie.

²⁶Etaase ena pee aa ore lelo tung'ana linyor Olaitoriani nchere mme ntokitin naabulu naaitoti iltung'ana kake ororei lino oing'or lelo likisilig iyie.

²⁷Ore enapa daa neitu einyiala te napa kima, neshola tadekenya pee eosh enkolong e tadekenya.

²⁸Neitadamu iyiook ena pee kidamu aainyototo aaomon nikinchooyo enashe egira enkolong aiteru ailepu.

²⁹Kake ore osiligi leilo lemeeta enashe nesholari anaa osoit le nchan, nemita anaa enkare nemegirae aasishore.