Read Maasai Bible – Biblia Sinyati Eng'eno nagut e Solomon 19 Bible Online

Eng'eno nagut e Solomon 19 - Maasai Bible – Biblia Sinyati bible

Eng'eno nagut e Solomon 19

¹Eewuo engoro ino enetii lelo arruok metii olng'ur, amu etayiolo Enkai inkiasin apa naayieu neas,

²itayilo iyie ajo ore hoo neishoo iltung'ana linono meshomo neitasiooyo, keibelekeny indamunot enye nekuet aasujaa.

³Ore eton egira aaishiraki lelo lenye ootii inkuraren, neas enkias e modai aasujaa lelo rrindiki apa ootasayia meshomo.

⁴Nerikoo ina natum ninche ina kiting'oto e nkop, neiko metorikinoto ina nanoto apa ninche pee eitabaya ina kitamioto neitu etum.

⁵Neaku ore epuoito iltung'ana linono teina lototo e nking'asia netum keeya torrono lelo mang'ati.

⁶Eibelekenyaki empukunoto e nkop te nkiroroto ino pee menyamalu ake iltung'ana linono.

⁷Etoduaaki inkatampo pee eimulumul ilo ng'obor o ina kop nairragie apa enkare, nebulaki inkujit empolos oo lopir le nkare nepuku enkoitoi naim metii enyamali.

⁸Nedol iltung'ana linono pooki ina bae e nking'asia nelang'aki likae kekun.

⁹Nemanimanaa anaa imbartan, neipidipid anaa ilkuoo le kerra kisis iyie Olaitoriani otomituo ninche,

¹⁰neton ake edamu nena naanoto ninche eton etii esinkaisho, eiputa enkop ilpidila aalang enatii inkishu neiput inkariak intuaan alang isinkir.

¹¹Ore te siadi neitoki aadol ae mua oo motonyi pee erikoki eyieuna metoomonu ae daa namelok,

¹²ore te nkaraki ina yieuna neishori ikurlen naing'uaa enaiposha.

¹³Enoto lelo tung'ana arruok enkitamioto eidipa enkikurrukurr sapuk aikoo ninche, netum ninche ingolikinot kumok naishiaa te nkaraki nena torrok enye amu keiba apa ninche ilomon.

¹⁴Etii ilkulikae ootanya eng'amu ilomon ooetuo aabaiki neitaa lelo omon lenye irrindiki lelo apa laa etaramata ninche enyamal.

¹⁵Enaikash lelo oototona aang'amu ilomon hoo naa ketum ake sii ninche enkitamioto enye

¹⁶kake ore kulo Misiri netang'asa aang'amu ninche aaitobiraki neitaa ilkulenye kake neitoki aaisilisil oleng.

¹⁷Etaaraki kulo tung'ana aaita modook anaa ilapa tung'ana le Sodoma otii kutuk aji olapa tung'ani supat, neitamani enaimin sapuk ometala pooki kutuk aji enetii.

¹⁸Keeta olwulul mpit kumok nemeeta empito nemeeta oltoilo lenye opaashari kake keidimi aaibung'ie iltoiloishi olkulikae toiloishi pee eitayu likae toilo opaashari.

¹⁹Eibelekenyaki ing'uesi e nkop aitaa ine nkare, ore ine nkare nepuonu enkop.

²⁰Nepok enkima te nkare neitu ear enkare

²¹neitu epej enkima nena ng'uesi naaimita ina kima neitu sii epej ina daa e keper naa anaata etoshole anaa osoit le nchan.

²²Ore te pooki toki neilepunyie Enkai iltung'ana lenyena neitaa kituaak neitu aikata epalaa eitu eret pooki kata te pooki wueji.