Read Maasai Bible – Biblia Sinyati Eng'eno nagut e Solomon 4 Bible Online

Eng'eno nagut e Solomon 4 - Maasai Bible – Biblia Sinyati bible

Eng'eno nagut e Solomon 4

¹Enaikash tinimiata inkera niata enkarna sidai, amu kedamuni ina sidano ino ntarasi, naa ekishilaa Enkai nikishilaa iltung'ana.

²Ore ina sidano ino naa keaku enkishilii naing'ori, ore pee iaku mitii naa kedamu iltung'ana. Ninye entoki naisul naidim oltung'ani anoto anaa enkishooroto, naa ninye entoki naisul naidim oltung'ani ataa keeta.

³Ore hoo duoo neini inkera kumok e boo, meetae hoo nabo naaku toki. Meikenari ninche aajo hoo nyoo nemeaku aikata toki.

⁴Enyor neitapuku penyo nemeeta intona naagol, keing'unung'unie osiwuo nedotu,

⁵neurori ilng'osil lenye eton eitu ebulu aaku toki, nemeaku aikata ilng'osil lenye toki.

⁶Ore inkera e boo naa keaku ilchakenini loo ntorrok oo ntoiwuo enye ina olong,

⁷kake ore iltung'ana supati naa ketum eneyeng'iyeng'are hoo netuata aa kutiti.

⁸Keishori moruao enkanyit kake mme te nkaraki netobiko oltung'ani ilarin kumok,

⁹ore eng'eno o enkishon sidai naa ilbulabul le mbulunoto ooirimunye o emoruao.

¹⁰Etii apa oltung'ani oji Enok oitishipa Enkai nenyorru Enkai oleng, ore ebikito o ilaing'okok neilepieki aaya keper,

¹¹pee melo ake neibelekeny entorroni oltau aashu indamunot enyena.

¹²Ore enyorrata oo ntorrok naa keitemoo isidan, ore enyorrata sapuk naa keidim aiminie oltung'ani oshal.

¹³Ore Enok neitaaki bayaroti te nkata dorrop oleng, neitabaya ilarin kumok oleng.

¹⁴Eitishipa apa Enok Enkai oleng omeitayu Enkai asioki tena kop torrono,

¹⁵nedol iltung'ana kake eitu ening'u aashu epik iltauja lenye aajo ore empiris e Nkai o olng'ur netii tenebo o lelo gelunot lenyena naa keing'or ninye isinyat lenyena.

¹⁶Ore oltung'ani supat otua apa naa kedung'oki enkiguana lelo arruok ooishu, ore elelero naa aibayaroti te Nkai naa keitukurru ilmoruak leme bayarot.

¹⁷Kesioki lelo supati aaye aa kutiti kake meyiolou aikata lelo torrok aajo enkoitoi e Nkai ena neyeng'iyeng'ie ninche te wueji sidai.

¹⁸Keinosaa to lmena keeya eilo supat kake kekueniyie ninche Olaitoriani, ore teneye ninche nemenukari te nkanyit naa kemenaa ninche ilootuauta ntarasi.

¹⁹Kenang'aki Enkai ninche enkop neitigir, keitaae ninche pesho, nerikinisho katukul.

²⁰Kepuonu lelo arruok enkiguana eikirikira, naa keikenuni ing'ok enye, nedung'oki iyiasat enye torrok enkiguana.