Read Maasai Bible – Biblia Sinyati Eng'eno nagut e Solomon 6 Bible Online

Eng'eno nagut e Solomon 6 - Maasai Bible – Biblia Sinyati bible

Eng'eno nagut e Solomon 6

¹Entoning intae lo aiguanak nining'ung'u, enteng'enuoto intae lo arishak le nkop pooki.

²Intorere intae inkuapi kumok ning'idada te nkaraki nintorere iloshon kumok,

³kake ore ena golon e nkitoria inyi naa Olaitoriani otii shumata aisul oishoo intae. Keing'or ninye oleng asipu nena niasiasa o nena niyieuu niasiasa,

⁴amu ore anaa enirara ilaisiaayiak te nkitoria enye, mirikishosho te nkoitoi naishiaa nimisujusuju inkitanapat ashu ipuopuo te nkipirta Enkai,

⁵kelotu ninye enitii miyiololo neitame intae oleng amu ore enkitamioto nesesh etum lelo otii erikore.

⁶Ore iltung'ana liabori naa keing'urieki kake ore ilarikok naa ketemi oleng.

⁷Meure Enkai likai tung'ani hoo obo enyor neeta engolon nabaa, ninye oitobira pooki tung'ani ologol o lemegol neing'or pooki te risioroto.

⁸Kake keing'or oleng lelo aitoriak.

⁹Entoning naa oleng intae laiguanak magilan ilomon laainei pee inteng'enuonuo nimipong'oriri.

¹⁰Mbaa kuna naasinya neishia nesuji te sinyaroto pee eikeni intae aajo irara sinyat. Tininteng'ena ate kuna baa naa indimidimi aatomitu ate teina olong e nkiguana.

¹¹Entonyor naa enkiteng'ena ai nishipakinono pee ing'enunu.

¹²Kewang eng'eno nemeiliilari, ore lelo oonyor ninye neing'oru netum aasioki.

¹³Keishooyo eng'eno kewan te lelo ooyieu ninye.

¹⁴Ore ilo oinyototo tadekenya aing'oru nemenyamalu amu keinepu ninye etonita te kishomi.

¹⁵Tinining eng'eno aitobiraki ning'enu katukul. Tiningo'ru ninye nitum eseriani oo ndamunot,

¹⁶amu keaku lelo ooing'oru ninye eiyiaya, neyiaya ninche epuo neyiaya sii too ndamunot enye.

¹⁷Ore enkiterunoto e ng'eno naa keiteru tiniyeu nikinteng'eni, tininkasie enkiteng'ena naa enyorrata e eng'eno,

¹⁸ore enyorrata e enye naa enkibung'ata oo nkitanapat enyena, ore enkibung'ata oo nkitanapat naa eyiolounoto nchere miye,

¹⁹ore eyiolounoto nchere miye nikintinyikaki Enkai.

²⁰Ore naa ena nyorrata e eng'eno nagut nerrikoo te nkitoria.

²¹Ore naa intae lelo arikok tininyorinyoro erikore inyi enturia eng'eno pee etumokiki aatorikoi anaake.

²²Kaliki intae ajo kainyoo eng'eno naa kaji eikununye. Maisudoo hoo toki, kajur ninye aiteru apa pee etumi omaitayiolo intae esipata enye. Mamenaa hoo pito e sipata.

²³Matum hoo olom pee eitu aliki intae pooki toki. Meiriamari eng'eno o ndamunot naayia nji.

²⁴Ore enkop naa ng'eni iltung'ana kumok neitajeu ina kop, ore olaiguanani ng'en neutaa iltung'ana lenyena aitobiraki.

²⁵Enteng'enuoto naa too rorei laainei naa itumutumu dupoto.