Read Maasai Bible – Biblia Sinyati Eng'eno nagut e Solomon 7 Bible Online

Eng'eno nagut e Solomon 7 - Maasai Bible – Biblia Sinyati bible

Eng'eno nagut e Solomon 7

¹Kara ake sii nanu oltung'ani oye, ore anaa ilkulikae tung'ana kara sii nanu eishoi eilo tung'ani le dukuya oitayioki te nterit. Te nkoshoke e yieyio lai aaitobiruaki,

²te rishata oo lapaitin tomon, tiatua eishoi o lee tiatua kiyama.

³Ore pee aaini, naiteru ayang'aki ena kijape naayang pooki ng'ae naa ore anaa pooki ng'ae ore oltoilo le dukuya laitayio naa enkishirata.

⁴Aitubuluaki aaitobiraki naishopokini inkilani e keraisho,

⁵amu meetae olaiguanani onoto likae kitubulunoto opaashari

⁶ewueji nebo eimu tung'ani pooki naa ewueji nebo eeim.

⁷Ina naa apa pee atoomono, naaishori ening'unoto, naipot Enkai naaisho eng'eno nagut.

⁸Eng'eno atudutayie nanu alang imasaa e nkitoo, naikenaa imasaa ajo meetae tinintanyaanyukie eng'eno.

⁹Neitu aitanyaanyukie ninye likae soit ogol enkinyang'a amu ore saabu netiu anaa osinyai te ninye ore enkosholai netiu anaa enterit ake te ninye.

¹⁰Atonyorra nanu eng'eno aitalang biyotisho o enkishiaa nagelu ninye aitalang ewang'an amu meishunye aikata ewang'an enye.

¹¹Ore pee atum eng'eno natum pooki toki sidai, aayaka ninye nanu imasaa nemeba toki.

¹²Atishipakine nanu pooki toki amu eng'eno narikoo ninche kake eitu apa nanu ayiolou ajo eng'eno ng'otonye ninche.

¹³Aaiteng'enaki nanu metii esunkuroisho, nemaisudoo dupoto eng'eno too ltung'ana,

¹⁴amu ore eng'eno nagut naa emasaai nemeishunye too ltung'ana, ore lelo ootum neaku ilchoreta o Enkai, neiken Enkai nena pooki naaisho intae eng'eno.

¹⁵Maataretoki Enkai mairoro arishisho natum indamunot anaa enaateng'enaki, amu ninye olarikoni le ng'eno naa ninye orerioo lelo ng'eni,

¹⁶amu ore iyiook o rorei lang naa inkaik enyena kitii anaa enatiu ening'unoto ang o enkidimata e siaai o nkaik ang.

¹⁷Ninye nanu laishoo nanu eng'eno nasipa matayiolo engolon oo ntokitin natii enkop o ntokitin naaitobirieki enkop o ntokitin naasa te nkop,

¹⁸enkiterunoto oo rishat o enkibelekenyata oo rishat,

¹⁹eneiko larin esuja o eneiko lakir esoto.

²⁰Aiteng'ena ninye nanu matayiolo olkitamanyunoto loo ng'uesi naaishu o lkuaak loo ng'uesi e ntim o engolon e osiwuo o eng'eno e tung'ani o mpukunot naapaasha o ntapuka o eng'eno nchere olchani intona o lkeek.

²¹Atayiolo nanu ntokitin naayioloi o nena neitu aikata eyiolouni,

²²amu eng'eno nagut naitobirua pooki toki naa ninye olaiteng'enani lai. Ore atua ninye netii enkiyang'et e ng'eno naa sinyati, nepaashari, neibala, neitodolu kewan too nkoitoi kumok, neneng, newang, nemeiduruk, nenyorrisho nemeru eas ae toki nabo,

²³nebor nenyor tung'ani. Keidimi aaimariria amu keisiligayu nemeureisho. Neeta enkitoria e pooki toki nedol pooki toki. Kejur pooki kiyang'et ng'en nemeiduruk.

²⁴Kesiooyo eng'eno te lototo alang pooki toki, meeta olduruk neaku keimaa atua pooki tung'ani.

²⁵Ore eng'eno naa engolon e nkiyang'et e Nkai, engolon e Nkai neitirirunye te Olaitoriani nemejing hoo toki naiduruk atua ninye.

²⁶Ewang'an ninye nawang'u intarasi, enkiok nasipa naitodolu esiaai e Nkai o esidano.

²⁷Ore hoo duoo neasisho eng'eno aa ninye openy, keidim ataasa pooki toki, keitaa pooki toki ng'ejuk hoo nemeibelekenya aikata ninye. Ore te eishoi o eishoi kejing ninye iltauja oo ltung'ana sinyat, neitaa ninche lchoreta le Nkai o loibonok.

²⁸Meeta entoki nanyor Enkai anaa iltung'ana ootoni aa ng'eni.

²⁹Aisidai eng'eno alang enkolong o lakir, keisidai alang ewang'an

³⁰amu enkewarie nasujaki endama kake megiroo aikata enkarruoisho eng'eno.