Read Maasai Bible – Biblia Sinyati Sirak 10 Bible Online

Sirak 10 - Maasai Bible – Biblia Sinyati bible

Sirak 10

¹Keiteng'en olarikoni ng'en iltung'ana lenyena neaku keitoriori enkitoria enye.

²Ore anaa enatiu olarishani neijia etiu ilkituaak lenyena naa ore anaa enatiu olarikoni le nkanasa neijia etiu ilopeny enkop.

³Ore olaiguanani lemeeta ening'unoto naa kemut iltung'ana lenyena kake kegolie enkitoria tenaa ng'eni ilarikok lenyena.

⁴Ore enkitoria natii enkop naa inkaik o Laitoriani etii naa kedumu ninye oltung'ani oishiaa te nkata naishiaa.

⁵Ore dupoto o ltung'ani naa inkaik o Laitoriani etii naa Olaitoriani oisho enkanyit pooki arikoni. Olwuasa

⁶Migorokino ake ole latia ino te nkaraki nikinyala, nimias ae toki torrono te nkaraki ina goro.

⁷Keiba Enkai olwuasa, neiba iltung'ana, neiba pooki enkitorogonya.

⁸Ore te nkaraki enkitorogonyare, o lwuasa, o lng'uarra loo mali, neoruni engolon e nkop aaisho ae.

⁹Kaji eiko ilo laa enterit o nkuruon pee eng'ida? Ilo laa ore eishu neng'uoyu imonyit enyena.

¹⁰Ore emuoyian nabikoki oltung'ani oleng neing'asieyie olabaani, keidim olaiguanani ataa keishu taata nining etua enkolong nasuju.

¹¹Eitadowuo Olaitoriani ilaiguanak nepik ilkulikae oobor iwuejitin enye.

¹²Ore enkiterunoto o lwuasa naa teneing'uaa oltung'ani Olaitoriani laa ninye oitobirua ninye.

¹³Ore enkiterunoto o lwuasa naa eng'oki naa ore oltung'ani oikonyaa aibung ninye neiput entorroni naa ina pee eyaka olaitoriani kulikae tung'ana enkitamioto nemut ninche katukul.

¹⁴Eitayio Enkai ilaitoriak too lorikan lenye le nkitoo nepik kulikae oobor ine.

¹⁵Etadotuo Enkai ilelo oowuasa o ntona enye nepik ilelo oobor irishat enye.

¹⁶Eitadowuo Enkai inkanas kituaak nemut inkurman enye.

¹⁷Nemut kulikae oshon katukul ometaa medamuni aikata.

¹⁸Eitu apa eitayu Enkai iltung'ana pee etum olwuasa aashu enyorru olarrabal. Iltung'ana ooishiaa neyanyiti

¹⁹Kaing'ae eishiaakino enkanyit? Iltung'ana. Kaing'ae eishiaakino enkanyit? Lelo ooure neisiaai Enkai. Kaing'ae meishiaakino enkanyit? Iltung'ana. Kaing'ae meishiaakino enkanyit? Ilelo oogil inkitanapat.

²⁰Keishiaa neyanyiti olarikoni lelo oosujita ninye naa keshilaa Enkai lelo ooiko neijia.

²²Ore ilkarsisi o loomena naa keng'idare pooki euriata e Nkai.

²³Meishiaa pee emenari olaisinani ng'en nemeishiaa sii pee eyanyiti olaing'okoni.

²⁴Ore olarikoni o larishani naa keyanyiti kake meetae olkitok alang oltung'ani oure Enkai.

²⁵Ore orrindik ng'en naa keisiaai iltung'ana oolakuno, nemeing'unyung'uny lelo ng'eni. Emborron o nkanyit e kewan

²⁶Mintodolu ake ajo ira arriyia te siaai ino aashu iisis kewan te nkata ninyamal,

²⁷enaikash oltung'ani oas esiaai neata pooki toki alang ololotoo ake nemeeta endaa nanya.

²⁸Enkerai ai, isisa kewan te mborron nishilaa kewan anaa enaishiaa.

²⁹Aing'ae nang'or oltung'ani opik kewan eng'oki? Naa aing'ae nayanyit olomenaa enkishui enye makewan?

³⁰Keidimi aayanyita olomena te nkaraki eng'eno enye kake neyanyiti olkarsis te nkaraki karsisho enye.

³¹Ore oloyanyiti emena naa keyanyiti oleng aa karsis, ore olomenari aa karsis naa kemenari oleng tenemenayu.