Read Maasai Bible – Biblia Sinyati Sirak 11 Bible Online

Sirak 11 - Maasai Bible – Biblia Sinyati bible

Sirak 11

¹Teneeta oltung'ani omena eng'eno naa keishiaa pee eng'ida naa keshilari aajo oltung'ani odupa. Impukunot

²Misis ake oltung'ani te nkaraki esidano enye. Mimenaa sii oltung'ani te nkaraki neme sidai.

³Aikiti olotoroki kake ore entoki naitayu naa kemelok oleng.

⁴Ming'ida ake te nkaraki ninchop inkilani sidain, aashu irupa te nkaraki nikinchori enkanyit, amu kias Olaitoriani mbaa e nking'asia naa meeidim oltung'ani atayiolo.

⁵Eeishutua ilaiguanak kumok irishat enye etonita te nkop neishop iltung'ana leitu aikata ening'i inkopiyiani enye e nkitoo.

⁶Eitukuruaki ilarikok kumok oleng, neitadoyiori ilkulikae aapik abori ilkulikae. Nteng'enuoyu

⁷Mipik oltung'ani intorrok nemeeta eton eitu isip ajo neijia eyia.

⁸Nining'o oleng eton eitu iwal, nimintasheyie likae tung'ani oirorita.

⁹Mijing enchankar e ntoki nimitii, mijing ake olkiu loo laing'okok.

¹⁰Enkerai ai, mincho kintanyamal imbaa kumok, tinijo aibung inkumok nikintanyamal, ilaikino aidipa esiaai ino nilaikino ailanya ashomo atung'uai.

¹¹Etii oltung'ani oas esiaai sapuk nenyok oleng kake meraposho aikata too nena naayieu.

¹²Etii likae oas mbaa akiti neyieu eretoto, meeta engolon, aisinanisho etii, kake keduaaki Enkai olng'ur nedumu ninye,

¹³ore pee edumunye aitashe neirut pooki ng'ae.

¹⁴Ore pooki toki sidai anaa torrono naa Olaitoriani eing'uaa: enkishui o keeya, karsisisho o aisinanisho naa Olaitoriani eing'uaa.

¹⁵Ore eng'eno nagut, o ening'unoto o eyiolounoto oo nkitanapat o enyorrata o easata oo sidain naa Olaitoriani eing'uaa pooki.

¹⁶Ore enkitadiata o enaimin netii apake tenebo o laing'okok te nkiterunoto, naa ore lelo pooki ooshipakino entorroni naa kebikie ometabaiki emoruao enye.

¹⁷Keibala olekoisiaayio le lelo oosilig Olaitoriani naa ore enaimie naa keishur intarasi.

¹⁸Etii kulikae ooaku karsisi te ngolon enye sapuk kake ore olekoisiaayio lenye naa ele;

¹⁹ore enoshi kata ejo “Katon taata aitobiraki ashipakino dupoto nanoto!” Nemeyiolo aajo ke rishata nabaa ebikoo eitu eye neng'ueiki ilkulikae.

²⁰Mbung'a iyie ine nitii oleng, tamorua iasita enoshi ake siaai ino.

²¹Mincho king'asieyie esiaai o laing'okoni kake siliga Olaitoriani ninyok oleng te siaai ino, amu kelelek too nkonyek o Laitoriani pee eitaa karsis olaisinani asioki.

²²Kemayian Enkai lelo ooiruk ninye neibalie emayianata enye te ninche.

²³Mijo ake, “Kainyoo ayieu naa kaa dupoto enaai teina olong nalotu?”

²⁴Mijo ake, “Kaata pooki toki naa kaa torroni sa naaidim anoto te siadi?”

²⁵Ore te nkata e sidano nerikino oltung'ani enyamali, naa ore te nkata e nyamali meetae oltunga'ni odamu dupoto.

²⁶Kelelek too nkonyek o Laitoriani pee eisho olerrinyore lenye te nkolong enye e keeya te nkiririkinoto o lkuaak lenye.

²⁷Ore enyamali e nkiti kata neiko oltung'ani metorikinoyu esikar, keyiolouni enayia oltung'ani te nkiting'oto e nkishui enye.

²⁸Mijo ake ng'ania oikash eton eitu eye amu keyiolouni pooki tung'ani too nkera enyena. Teng'ena igelu ilchoreta

²⁹Mintoomon pooki ng'ae te nkang ino amu aikumok irresheta loo lng'eni.

³⁰Ore oltung'ani owuasa netiu anaa entoki nikipik bata, ekishil anaa olaikitalani pee eyiolou enchalan ino.

³¹Keibelekeny imbaa sidain aitaa torrok, neitayu intorrok too mbaa sidain oleng.

³²Ore oltiili obo le nkima neeinok inkuk kumok, ore olaing'okoni naa keirrag erretena ake pee eibukoo osarge.

³³Toduaa ake lelo tung'ana torrok o mbaa enye torrok aashu kiyaki entaboi nemepuku aikata.

³⁴Ntoomono olomoni te nkang ino mikiyaki olong'oling'oli nikinko taarare olmarei lino.