Read Maasai Bible – Biblia Sinyati Sirak 14 Bible Online

Sirak 14 - Maasai Bible – Biblia Sinyati bible

Sirak 14

¹Enaikash oltung'ani lemepong'ori to lng'ejep lenye amu metum olng'ash nchere eitarruoyie.

²Kemayiana ilo lemeiguanare indamunot enyena o ltau neitu eiturraa osiligi lenye. Enkitobiraroto oo masaa

³Mme sidai teneaku oltung'ani opiak karsis. Kaa dupoto eeta karsisisho to ltung'ani opiak?

⁴Ore pooki ng'ae osot imasaa emitiki kewan naa ilkulikae esotoki pee enya naa kenya netoni te nkishon e sikar naleng.

⁵Amaa tenepiak oltung'ani te kewan, ae te ng'ae naa eleng'u? Tenemeshipakino ninye imasaa enyena.

⁶Meetae oltung'ani opiak anaa ilo oiba kewan, kelaaki ina kiba enye ninye makewan.

⁷Ore hoo neas isupati, keas meyieu, keliooyu ake ina torroni enye te siadi.

⁸Ore oltung'ani onyor kewan naa kaarruoni, keisho iltung'ana enkoriong nemenisho naleng.

⁹Meraposho enkong'u eilo onyor kewan teina naata naa ore empiani naa keitanaur oltau.

¹⁰Ore oltung'ani opiak nemeishooyo endaa nemepik ninye endaa emisa enye.

¹¹Enkerai ai, ing'ura kewan intobiraki anaa enindim, nincho Olaitoriani inkishoorot naaishiaa.

¹²Tadamu nchere meimutie keeya, neitu kilikini ina olong.

¹³Ore eton eitu ebau ina olong, ntaasa ilchoreta linono isidan nileng'u naleng anaa enindim.

¹⁴Mimitiki kewan enkolong nabo e nchipai, mincho ake erishata ino e nchipai naibala kilang.

¹⁵Ore nabo olong naa ing'ueiki kulikae pooki toki nitaasua, ore pooki toki nitaasua te siaai nagol neori te nkukuo.

¹⁶Nchooi pee kinchori sii iyie nitum enchipai to ltau, amu meeta esikar nitum te keeya.

¹⁷Kemoruau pooki toki anaa enkila amu ore te nkitanapata e apa naa nchere “Keye pooki toki!”

¹⁸Ore anaa enatiu imbenek o lchani naashurtari adoiki enkop nebulaki kulie, neijia etiu oltung'ani oata inkiri o sarge, keye obo neini likae.

¹⁹Ore pooki toki naitobirua oltung'ani naa kemuta neng'uoyu, ore oltung'ani oitobirua naa keye. Enchipai teniaata eng'eno nagut

²⁰Kemayiana ilo oibirribir ine ng'eno nedamisho te ng'eno nagut.

²¹Ore pooki ng'ae ojo ayiolou inkoitoi e ng'eno naa keyiolou inkisudorot enyena.

²²Tusuja eng'eno anaa olang'oroni nirrag aanyu ninye too nkoitoi enyena.

²³Rumuruma ninye too lusien enyena nining'u ninye too nkutukie oo nkajijik enyena.

²⁴Tinyikaki olng'obor lenye oleng anaa enindim,

²⁵naa itum ewueji sidai nimany.

²⁶Kepik inkera enyena aitushur to lng'obor neirrag tiabori ilng'osil lenyena.

²⁷Ketum te ninye oloip oibooyo enkolong neton te sikar enye.