Read Maasai Bible – Biblia Sinyati Sirak 15 Bible Online

Sirak 15 - Maasai Bible – Biblia Sinyati bible

Sirak 15

¹Ore oltung'ani oure Enkai naa keas ena: keibung inkitanapat enyena naa ketum eng'eno nagut.

²Keitoomon eng'eno anaa yieyioo enye aashu anaa esiankiki enye.

³Neitoomonie emukate e yiolounoto neisho enkare e ng'eno nagut metooko.

⁴Keigarakino ninye nemesulari, neisilig ninye, nemetum aikata enkurruna.

⁵Keitaa ninye yioloti alang ile latia enye pooki, ore pee eiro to lkiu neisho ninye ilomon oojo.

⁶Etum ilo tung'ani enchipai sapuk oleng nedamuni enkarna enye pooki kata,

⁷kake ore lelo oomoda aashu ilaing'okok nemedol aikata eng'eno,

⁸kelamita oleng iltung'ana oowuasa nemedamu aikata ilaimonkok ninye.

⁹Meishiaa pee erany olaing'okoni isinkolioitin le nkisisa amu ore enkisisa enye nemesipa.

¹⁰Ore osinkolio naa keishiaa pee eranyi te ng'eno, neitubulaa Enkai. Tegelu eniyieu

¹¹Minteeniki ake Enkai eng'oki ino, mikincho Enkai taasa ina nemeyieu.

¹²Mijo ake “Ninye laaishoo matapong'ori” amu meetayie ninye tipat olaing'okoni.

¹³Keiba Enkai pooki minong naa ore illoonyor Enkai naa keiba intorrok.

¹⁴Ninye apa naitobirua oltung'ani te nkiterunoto neisho engolon naasakinye kewan pooki toki nayieu.

¹⁵Tiniyeu, naa indim aibung'a inkitanapat e Nkai nibik te sipata aashu iany, iyie eek!

¹⁶Etipika ninye enkare o enkima dukuya iyie, tegelu nabo niyieu.

¹⁷Kinchooki tegelu enkishui o keeya, itum ina nitegelua.

¹⁸Aisapuk eng'eno o Laitoriani naa kitok, kedol pooki toki,

¹⁹ketii nkonyek enyena lelo ooure ninye neyiolo pooki naas oltung'ani.

²⁰Eitu aikata eitanap oltung'ani pee eaku arruoni aashu eitanap pooki ng'ae metaasa eng'oki.