Read Maasai Bible – Biblia Sinyati Sirak 16 Bible Online

Sirak 16 - Maasai Bible – Biblia Sinyati bible

Sirak 16

¹Enkitamioto Enkai too ilaing'okok Ming'uar ake pee itum inkera kumok nimikiyaki dupoto aashu ing'idare eishoi nemeure Enkai.

²Teneaku kumok mincho kinting'id ina aashu naa ake tenaa keure neisiaai Enkai.

³Mipik ake osiligi lino ninche nchere kebik eishu, ming'idare sii enkumoi enye. Keng'uarrayu enkerai nabo nalo te yieunoto e Nkai alang enkalifu nabo nemeure Enkai.

⁴Ore te ng'eno o ltung'ani obo neiput iltung'ana enkanasa, kake ore te nkaraki entalipa oo ltung'ana torrok nebik aa mijooni.

⁵Etoduaa nkonyek aainei intokitin kumok naaijo kuna netoning'o inkiyiaa aainei imbaa e nking'asia naalang kuna.

⁶Keinoki enkima to lturrur loo laing'okok, kepuku sii engoro te nkanasa naas ing'ok.

⁷Eitu apa epalaki ilapa tiamasin ootigilunore ninye eng'idare engolon enye.

⁸Eitu apa eing'urrie Enkai elatia e Lutu, eitagoro apa olwuasa le lelo tung'ana.

⁹Eitu apa eing'urrie enkop natipikakaki emutata te nkaraki ing'ok enyena,

¹⁰o lelo lewa lo larrabal oora inkalifuni iip ile oopuo too nkejek tii ong'ata nesoto pee eitayu olarrabal te nkaraki ilo wuasa lenye.

¹¹Ore tenetii oltung'ani obo ogol lukunya, keaku kemunyak oleng teneilany enkitamioto. Keeta Enkai olng'urr kake kegoro sii, keidim atapalaki ing'ok torrok oleng.

¹²Ore anaa enatiu olng'urr lenye neijia etiu engoro enye, keiguan ninye oltung'ani te risioroto oo nkiasin enyena.

¹³Meeisik olaing'okoni o entoki natupurroyie nemelo pesho eng'iriata e lelo ooisiaai Enkai.

¹⁴Ore pooki tung'ani asipani naa ketum olekoisiaayio, ketum pooki ng'ae ina naishiaa.

¹⁷Mijo ake “Kaisudoriyie Olaitoriani nemeetae oltung'ani laadamu! Kaji eikoni pee aayiolouni te umata oo ltung'ana kumok, kainyoo dupoto ai te umata naba nji?”

¹⁸Ore pee elotu Olaitoriani neikirikira pooki toki, e nkop o nkariak pooki naatii abori, oloing'ang'e o shumata pooki.

¹⁹Keikirikira ildoinyo o lkitamanyunot le nkop tiabori teneing'or Olaitoriani.

²⁰Meetae oltung'ani odamu ena, aing'ae naidim aibirribirra inkoitoi enyena?

²¹Tenaas ing'ok too nkurrat, meeta oltung'ani oyiolou.

²²Tenaas ina naishiaa, meeta oltung'ani oibalie. Kaing'ae oidim ataanyu ninye, kebaraki ninye aas ina natejo keas.

²³Oltung'ani ake kiti endamunoto nemoda oas entoki naaijo ena. Eng'eno e Nkai too naaitobirua

²⁴Inining'oki enkerai ai pee itum eng'eno nining'u oleng inaajoki.

²⁵Kaaisho nanu enkiteng'ena nairoishi naaiteng'en te nkarriyiano.

²⁶Ore apa pee eitobiru Enkai pooki toki te nkiterunoto nepik ilpolosien,

²⁷neitaarriyian pooki toki te nkarriyiano o eishoi enye pooki, nemetum esumash aashu enauru aashu epal esiaai enye.

²⁸Meetae hoo ae rubata naikormoja o enkae nemegolong'aki aikata ororei lenye.

²⁹Ore pee eitobiru Enkai kuna pooki neing'or enkop neeiput intokitin sidain.

³⁰Neiput ninye pooki ng'uesin naaye neshukokino enterit.