Read Maasai Bible – Biblia Sinyati Sirak 22 Bible Online

Sirak 22 - Maasai Bible – Biblia Sinyati bible

Sirak 22

¹Enchalan o emodai Keitanyaanyukieki oltung'ani oshal osoit oata oloirerio, ore pee edol pooki ng'ae nepaash.

²Keitanyaanyukieki oltung'ani oshal emodiei, ore pooki ng'ae ooibung nejutoo too nkaik enyena.

³Enkurruna sapuk tinira menye lo layioni omoda, naa teneini entito nemeeta enkanyit nemeeta dupoto.

⁴Ore entito ng'en naa ketum olpayian oya, kake ore enaas inkiasin e modai neyaki menye olkiyioi.

⁵Ore entito nemeeta enkanyit naa keitukurru menye o lpayian lenye naa kemenu ninche ninye.

⁶Etiu enkatini nainosuni te nkata nemeishiaa anaa osinkolio le nkata o lkiyioi kake ore enkitamioto naa enkias e ng'eno pooki kata.

⁷Ore enkiteng'ena o lmodai netiu anaa empetoto e moti oo nkulupuok natadanye, netiu anaa endumunoto nidumu oltung'ani oirure.

⁸Ore ilo oinosaki olmodai enkatini naa oltung'ani oirura einosaki naa ore te siadi nejo “Kainyoo itejo?”

¹¹Nchiraki ilootuata amu meeta ewang'an, nchiraki olmodai amu meeta eng'eno, nchiraki ilootuata te mion neme sapuk amu enoto ninye enkiyeng'iyeng kake ore enkishui o lmodai naa aitorrono alang keeya.

¹²Ore olkiyioi oishirakini ilootuata naa inkolong'i naapishana ake eya, kake ore eno lmodai aashu oltung'ani lemeyiolo Enkai neya nkolong'i pooki e nkishui enye.

¹³Miparan ake ilmoda aashu iya enkata sapuk airorie ninche. Tapaashare pee mipik kewan enyamali naa ibik te seriani nimikintanyamal emodai enye.

¹⁴Kainyoo nairoishi aisul alang osekenkei? Naa kainyoo enkarna enye: “Olmodai”?

¹⁵Enaikash enapata o sinyai, emunyan o sekenkei alang teniboitare oltung'ani omoda.

¹⁶Keidimi aatipik embaoi enkaji nekurrakini ometaa meeta enaiko enkikirikirata e nkop, keidimi sii aitamoo oltung'ani metaasishore eng'eno enye ometaa meureisho te nkata e nyamali.

¹⁷Ore oltung'ani oata ndamunot e ng'eno netiu anaa esuntai natukusoki too masaa.

¹⁸Meitashe esuntai nemeuno aitobiraki tenelotu osiwuo, neijia etiu oltau kuret omoda, meuno teneiturei. Shoruetisho

¹⁹Ore oltung'ani orem kewan enkong'u naa kepuku ilkiyio, naa ore olorem oltau naa keitodolu emion.

²⁰Ore olonang'aki imotonyi osoit naa kemiraa naa ore oloitagor olchore naa kegil shoretisho.

²¹Ore hoo duoo nindipa atudumaki olchore lino olalem, miureisho amu keidimayu pee isaru ina shoruetisho inyi.

²²Tinitejo toki tialo olchore lino, miure amu keidimayu pee ipalakinono kake ore emorore o lmena o limunoto oo nkurrat aashu olaarabal le pesho naa keisikie ilchoreta.

²³Nchoo metaa ekisilig ole latia ino te nkata e aisinanisho enye, pee ishipapa tenebo ninye tenetum dupoto. Tareto tenelo nenyamal pee itum erishata ino too mali naatum.

²⁴Ore empuruo naa ninye osapipiyiet le nkima neijia etiu imorot ninche enkiterunoto e enkibukoroto o sarge.

²⁵Makurru tenamitu olchore nemaisudoriyie ninye,

²⁶kake ore paa kanyamalu te nkaraki ninye, ore pooki ng'ae oning ina neilany. Enkomono e retoto te nkaraki eng'oki

²⁷Oi tenaa ketipikaki enkutuk ai olarriponi pee eripi enkutuk ai, kaaibok pee maas intorrok naaibok pee mainyal kewan te olng'ejep lai.