Read Maasai Bible – Biblia Sinyati Sirak 23 Bible Online

Sirak 23 - Maasai Bible – Biblia Sinyati bible

Sirak 23

¹Olaitoriani, Papa naa Olarikoni le nkishui ai, mikipalaki enkiguana oo rorei laainei nimikincho abatata te nkaraki ninche.

²Oi aaoshi ndamunot aainei, neiteng'eni oltau lai iutarot e ng'eno,

³pee maitoki aas ing'ok aponaa nemabatata te dukuya ilmang'ati laainei.

⁴Olaitoriani, Papa lai naa Enkai e nkishui ai, aaomon pee matum ake eng'ida,

⁵tang'adieki ing'uarrat torrok.

⁶Mikincho ake manoto olorok aashu enkiborra oo nkonyek, mikipalaki maaitoria nena ng'uarrat torrok. Enkinosata oo lmuma

⁷Nakera aainei, enining'o nkikoot aainei naaipirta nkirorot, ore ilo oinining nemejing aikata orreshet.

⁸Keibung ilaing'okok inkirorot enye e morore o lwuasa.

⁹Mitum ake olkuaak linya lmuma pooki kata aashu iasishore enkarana e Nkai te nkoitoi nemeishiaa.

¹⁰Ore orrindik oidong'i anaake nemelau aikata nkiporo, ore pooki ng'ae onya ilmuma to nkrna e Nkai nemelau aikata eng'oki.

¹¹Ore oltung'ani onya ilmuma kumok naa olaing'okoni obayie nemelamita aikata enkitamioto enkaji enye. Ore pee elaikino aitabai ilmuma lenyena neitadiak, ore pee emenaa olmumai oinosa neitadiak sii, ore paa emesipa apake olmumai oinosa te nkiterunoto nemepalakini, naa kenyamalu oleng te nkaji enye. Inkirorot neemeta tipat

¹²Etii enkiroroto nabo naaijo keeya. Oi metumi aikata ina te ishoi e Yakobo! Ore iltung'ana ooserem Enkai nemeas ing'ok naayia neijia, naa kelam oleng ilelo kuuaki.

¹³Mitum ake olkuaak lijoyie intorrok, eng'oki ina.

¹⁴Tiniton te umata oo lkituaak, tadamu Papa o yieyio lino pee mikirikino ake te dukuya lelo kituaak nikidoli anaa olmodai te nkaraki olkuaak lino. Ekinosu ina kata ajo oi eitu kiini nidek ina olong nikitoiwuoki.

¹⁵Ore oltung'ani otamoo ejo lomon le morore pooki kata nemetum aikata olkuaak sidai inkolong'i enyena pooki. Ing'ok e loloito

¹⁶Ore iltung'ana oopaasha naa keponaa easata oo ng'ok, ore ene uni netum enkitamioto e Nkai, keidim oltung'ani anoto olng'uarra anaa enkima nemearayu ometaari. Ketum oltung'ani olng'uarra le nkiborra oo nkonyek nemepal ometapejori te nkima.

¹⁷Ore to ltung'ani oibor onyek keng'uarrayu pooki kitok nemepal aikata ometua.

¹⁸Ore olee ogil ilmuma lenyena le nkiyama naa kejo makewan “Aing'ae naadol? Kaamanita enaimin naaisudoo isunta neaku maadoli, kainyoo pee aureisho? Medol Enkai Kitok nena ng'ok aainei.”

¹⁹Iltung'ana ake eure oltung'ani laaijo ilo nemeyiolo ajo ore inkonyek e Nkai naa kewang oleng aalang enkolong, keing'or oleng inkoitoi oo ltung'ana nedol iwuejin neeisudoro.

²⁰Ore apa eton meitobiruno enkop naa keyiolo ake ninye naa neijia etiu eidipa aitayu.

²¹Ore oltung'ani laaijo ilo naa keitamei too nkoitoi e nkanasa neibung'i te wueji nemeiteiki.

²²Nejia sii ninye etiu enkitok naing'uaa olpayian lenye neiu inkera o likae lee.

²³Ore ene dukuya, etemenayie ina kitok inkitanapat e Nkai, ore eniare netaasa eng'oki to lpayian lenye, ore ene uni netaasie osesen lenye mulayoisho neiu inkera te likae lee.

²⁴Keyauni ninye dukuya e rikore naa ketum inkera enyena ina kitamioto.

²⁵Medupoyu inkera enyena nemeisho ilng'osil lenyena.

²⁶Keing'uaa endamunoto e ng'oki nemejuti aikata ina kurruna nayawua.

²⁷Ore lelo ooing'uari eishu tenelo ninye naa keyiolou inchere meetae entoki sidai anaa eseremata e Nkai nemeetae enamelok anaa eyanyitata eina nayieu Enkai.