Read Maasai Bible – Biblia Sinyati Sirak 24 Bible Online

Sirak 24 - Maasai Bible – Biblia Sinyati bible

Sirak 24

¹Enkisisa e ng'eno nagut Keisis eng'eno kewan nedumu kewan te umata oo ltung'ana.

²Ore te dukuya Olotii Shumata Aisul nebol enkutuk enye naa ore te dukuya oloitoomono ninye nedumu kewan ajo

³“Atupukuo nanu te nkutuk e Nkai Kitok naibulaa enkop anaa enkinuku.

⁴Namany iwuejitin neerupa, ore olorika lai le nkitoo netii atua enkatampoi.

⁵Atamana openy emanaroto e keper namanaa omashomo olodo le nkop.

⁶Kaitore nanu ilopir le nkare o enkop pooki o ltung'ana pooki.

⁷Naing'oru te nenen pooki enayengiyeng'are, naing'oru ajo ke wueji e ng'ae amany.

⁸“Teine aaishoo Olaitobirani le pooki toki enkitanapata naaisho ilo laaitobirua ewueji napik olng'obor lai.

⁹Ore aiteru apa mooitie te nkiterunoto, naaitobirua nanu naa kabik sii nanu atii nemapal matii.

¹⁰Aisiaayia nanu ninye te wueji enye sinyati nadupoyu te Sion.

¹¹Aaishoo sii enayeng'iyeng'are te nkanasa enye nanyor neaku ore manyisho ai naa Yerusalem.

¹²Aibung'are iltung'ana yiolot laa Olaitoriani otegelua makewan.

¹³Atoodoro anaa iltuka le Lebanon o sii anaa ilera le Harmoni.

¹⁴Atoodoro anaa oltukai le Engedi o anaa yaridi e Yeriko nasidanu anaa osabibu te nkurma, naadoru anaa olchani oji olparamusi.

¹⁵Atorropilo anaa olng'usil lo lchani oji dalasini o lkakaya naitadaraa olng'usil sidai anaa ole manoo ng'ejuk anaa olng'usil sidai laaijo ole udi to lng'obor.

¹⁶Aisalaasha ilng'osil laainei anaa olchani oji mwaloni naa aisidan naa keitishipisho te nidol.

¹⁷Aitadedeyie esidano anaa osabibu neitapuku intapuka aainei neiu ilng'anayio kumok.

¹⁹Ootu intae enatii nanu, intae pooki liking'uaring'uara enosa niraposhosho ilng'anayio laainei.

²⁰Ore endamunoto ai naa kemelok alang enaisho oo lotorok, ore entumoto ai naa kemelok alang olkimalati lo lkenkei.

²¹Enosaki nanu naa miraposhosho aikata, entookoki nanu naa meishunye intae enkure.

²²Eyanyitaki nanu pee melo aikata nikurrurru, taasa anaa enajo pee mijing'ijing'i atua ng'ok.” Eng'eno nagut o Nkitanapat

²³Ore eng'eno nagut naa Enkitanapata, ina kitanapata naitanapa iyiook Musa pee kimbung, enkitanapata e Nkai natii Shumata aisul anaa enjung'ore oo lturrurri pooki loo Siraeli.

²⁵Keiput eng'eno iltung'ana anaa ireyieta le Frati o Tigri te nkata oo lng'anayio le nkiterunoto.

²⁶Keiput intae enkitanapata eng'eno anaa oreyiet le Frati o anaa oreyiet le Yordan te nkata e nkesare.

²⁷Keiko enkiteng'ena metawang'a oleng, anaa Gihon te nkata e nkesare oo sabibu.

²⁸Eitu apa eyiolou oltung'ani le dukuya eng'eno oleng nemeyiolou sii ninye oltung'ani obayie ninye aitobiraki.

²⁹Aisapuki inaaidim eng'eno ataasa alang enkare e naiposha negut iutarot enyena anaa olodo le nkop.

³⁰Aitadedeyie kewan anaa enkare naijirrijirrunye epuku to reyiet anaa enkare narukokino enkurma oo sabibu.

³¹Najo, “Kaisuaaki enkurma ai oo sabibu enkare natur aitobiraki” Naing'asia amu eibelekenye enong'oto aaku oreyiet neaku oreyiet enaiposha.

³²Kaitoki naa aiko enkiteng'ena metawang'a anaa enkakenya naiko metawang'ari alo enelakua.

³³Naitoki aiko enkiteng'ena metotiwuo anaa enaibon nang'ueiki iishoritin pooki naapuonu.

³⁴Entodol ajo eitu anauriki kewan ake kake lelo pooki ooing'oru enkiteng'ena.