Read Maasai Bible – Biblia Sinyati Sirak 25 Bible Online

Sirak 25 - Maasai Bible – Biblia Sinyati bible

Sirak 25

¹Iltung'ana ooishiaa enkisisa Keshipakino oltau lai intokiting uni naa aisidan too nkonyek o Laitoriani o enoo ltung'ana: ilalashera ooning'uno aaitobiraki, ile latia ootoni aaitobiraki o enkitok o lee naatoni aaitobiraki.

²Keiba oltau lai ilewa loo kuna pukunot naa kaaitanaur naleng enkishui enye: olaisinani oomonisho newuasa, olkarsis olejisho o lee oibor onyek oata monko.

³Amaa teneitu isotu toki te kitisho ino, kaji naa inko pee isotu toki te moruao ino.

⁴Embae sidai oleng tenedung olpayian oiborra omunyei enkiguana aitobiraki neikokisho ilooata ilarin kumok aitobiraki.

⁵Keitishipisho oleng eng'eno too lpayiani, neijia etiu enkikoo naishiaa o eutaroto naing'uaa iltung'ana yiolot.

⁶Ore lpayiani moruak naa keeta enkarriyiano sapuk e nkishui naa keng'idare enkisisa o Laitoriani.

⁷Kayiolo mbaa naaudo naa kayanyit oleng to ltau lai naa kaliki sii ntae ene tomon: oltung'ani oshipa te nkaraki inkera enyena, oltung'ani obik adol ilmang'ati lenyena emuta,

⁸enaikash ilo oata enkitok ng'en, oi ilo leitu errorro to lng'ejep lenye aashu ilo leitu eisiaai oltung'ani kiti enkitoo te ninye,

⁹enaikash ilo onoto eng'eno nadupa aashu ilo oirorie eumata nabor einining'isho.

¹⁰Kebaa esapuko eilo onoto eng'eno nagut! Kake meetae osapuk alang ilo oure Olaitoriani.

¹¹Aisapuk euriata o Laitoriani alang pooki toki, ore oltung'ani laaijo ilo nemeetae likae oitanyaanyukieki. Inkituaak

¹³Meetae olbae oba anaa ole nyorrata o ltau, aisapuk enyamali nayau inkituaak.

¹⁴Meetae eneba olosilisili oyau lelo likimba nemeetae elakunoto e lap naba anaa eno lmang'atinta.

¹⁵Meetae esayiet nalang eno lasurai nemeetae engoro naba anaa ene nkitok.

¹⁶Enaikash tenamany enkaji nabo o lng'atuny aashu ae tiamasi alang tenaboitare enkitok arruoni.

¹⁷Tenegoro enkitok, neibelekeny emua ometaa ijo olng'atuny otupusha.

¹⁸Ore tenenya olpayian lenye endaa o le latia nemeidim atigirayu eitu eilepilep te ngoro.

¹⁹Meetae enkarruoisho torrono alang ene nkitok o ltung'ani, ketum nena kituaak olbuket otum ilaing'okok.

²⁰Etiu olpayian supat oboitare enkitok nawuara anaa oltasat moruo okedito oldoinyo oisinyai.

²¹Mincho ake kilej esidano e nkitok, aashu ing'uar enkitok te nkaraki imasaa enyena.

²²Ore teniaku enkitok naibung'ita olpayian naa kelotu engoro o lwuasa.

²³Ore enkitok torrono naa keiturrarrie olpayian lenye enchipai, negil oltau. Ntoduaaki olpayian oata sura pee aaitodol enkitok nemeitiship olpayian lenye.

²⁴Eiterunye apa eng'oki te nkaraki enkitok naa aikiiye pooki te nkaraki ninye.

²⁵Mincho ake enkitok torrono eas enayieu anaa enincho enkare meibukori to ltoo.

²⁶Tenemeas anaa eniutaki, toorore.